ევროკავშირის უმაღლესმა წარმომადგენელმა, კაია კალასმა განაცხადა, რომ მიუხედავად აშშ-ის განახლებული დიპლომატიური ძალისხმევისა, მათ შორის, ამერიკელი წარმომადგენლების მოსკოვსა და კიევში ვიზიტებისა, რუსეთი მშვიდობისთვის რეალურ მზადყოფნას არ ავლენს.
ამის შესახებ ევროკავშირის მთავარმა დიპლომატმა ლიეტუვაში ვიზიტისას გამართულ პრესკონფერენციაზე განაცხადა.
მან ყურადღება გაამახვილა იმაზე, რომ ამერიკელი სპეციალური წარმომადგენლების კიევში ყოფნის სამი დღის განმავლობაში რუსეთის ძალებს უკრაინის დედაქალაქი არ დაუბომბავთ.
„მოხარული ვარ, რომ სპეციალური წარმომადგენელი პირველად ეწვია კიევსაც. უკრაინელებისთვის ეს იმას ნიშნავდა, რომ სამი დღის განმავლობაში მშვიდობიანი მოსახლეობა დაბომბვის ქვეშ არ ყოფილა. ეს ამ ვიზიტის დადებითი შედეგი იყო“, - განაცხადა კალასმა.
მისი თქმით, უიტკოფი და კუშნერი მანამდე რუსეთს რამდენჯერმე სტუმრობდნენ. კალასმა იმედი გამოთქვა, რომ უკრაინაში ვიზიტისას ამერიკელმა წარმომადგენლებმა ადგილზე არსებული ვითარება დაინახეს და შესაბამისი დასკვნები გააკეთეს იმის შესახებ, რამდენად მზად არის რუსეთი ომის დასასრულებლად.
კალასის განცხადებით, ამ ეტაპზე ის ვერ ხედავს რუსეთის მხრიდან მშვიდობის დამყარებით დაინტერესების ნიშნებს. მისი თქმით, რუსეთის მხრიდან უკრაინაზე თავდასხმები აჩვენებს, რომ მოსკოვი სამშვიდობო მოლაპარაკებებს სერიოზულად არ უყურებს.
„იმედი მაქვს, მათ მოისმინეს, როგორია ადგილზე არსებული ვითარება და ამან აჩვენა მათ, რომ რუსეთი, რეალურად, მშვიდობისთვის მზად არ არის. პირიქით, როდესაც ისინი ბრძოლის ველზე ინიციატივას კარგავენ, მშვიდობიან მოსახლეობას ბომბავენ. ამ ეტაპზე ვერ ვხედავთ იმის ნიშნებს, რომ რუსეთს მშვიდობა აინტერესებს. ისინი არც ერთ დათმობაზე არ წასულან,“, - აღნიშნა ევროკავშირის უმაღლესმა წარმომადგენელმა.
