„როსნეფტის“ კუთვნილმა სარატოვის ნავთობგადამამუშავებელმა ქარხანამ 2 აგვისტოდან ნავთობის გადამუშავება შეაჩერა. ამის შესახებ რუსული გამოცემა The Moscow Times-ი Reuters-ზე დაყრდნობით იუწყება.
მედიის ცნობით, ამის მიზეზი დრონების შეტევის შედეგად საწარმოო ობიექტების დაზიანება და გაჩენილი ხანძრები გახდა.
წყაროების ინფორმაციით, წელიწადში 7 მილიონი ტონა სიმძლავრის მქონე ქარხანაში გაჩერებულია ნავთობის პირველადი გადამუშავების ერთადერთი დანადგარი - АВТ-6. საწარმო, რომელიც ყოველწლიურად 1 მილიონ ტონაზე მეტ ბენზინსა და თითქმის 2 მილიონ ტონა დიზელის საწვავს აწარმოებს, ასევე შეწყვიტა საწვავის გაყიდვა სანქტ-პეტერბურგის სასაქონლო ბირჟაზე.
Reuters-ის წყაროების შეფასებით, ქარხნის აღდგენითი სამუშაოები შესაძლოა 2-3 კვირა გაგრძელდეს.
სარატოვის ნავთობგადამამუშავებელი ქარხანა დრონების თავდასხმის სამიზნე მიმდინარე წლის 8 ივლისსაც გახდა, რის გამოც საწარმომ მაშინაც შეაჩერა ნავთობის გადამუშავება. ტრეიდერების ინფორმაციით, ქარხანამ მუშაობა დაახლოებით ერთ კვირაში განაახლა.
სარატოვის ქარხანა აგვისტოში საწვავის წარმოების შეჩერებული მეორე მსხვილი რუსული ნავთობგადამამუშავებელი საწარმოა. ორშაბათიდან მუშაობა ასევე შეაჩერა „ლუკოილის“ ვოლგოგრადის ნავთობგადამამუშავებელმა ქარხანამ, რომელიც რუსეთის ათ უმსხვილეს ქარხანას შორისაა და ქვეყნის ნავთობგადამუშავების დაახლოებით 5%-ს უზრუნველყოფს.
ივლისში დრონების შეტევების გამო რუსეთში მუშაობა დროებით რვა ნავთობგადამამუშავებელმა ქარხანამ შეაჩერა, მათ შორის ომსკის, რიაზანისა და „ნიჟეგოროდნეფტეორგსინთეზის“ ქარხნებმა. შედეგად, ნავთობის გადამუშავების საერთო მოცულობა დღეში 3,6 მილიონ ბარელამდე შემცირდა, რაც 2002 წლის შემდეგ ყველაზე დაბალი მაჩვენებელია.
