ესპანეთის შინაგან საქმეთა სამინისტროს წარმომადგენლის, მიგელ ანხელ პერეს ტრიანოს განცხადებით, ზღვიდან კიდევ რამდენიმე ადამიანის ცხედარი ამოიყვანეს. მისი თქმით, მაშველები სეუტის სანაპიროსთან სამძებრო სამუშაოებს კვლავ აგრძელებენ.

ამასთან, მაროკოს უფლებადამცველი ორგანიზაცია AMDH აცხადებს, რომ სეუტაში განვითარებულ მიგრაციულ კრიზისს თითქმის 130 ადამიანი ემსხვერპლა, ხოლო ათეულობით ადამიანი უგზო-უკვლოდ დაკარგულად ითვლება.

ორგანიზაციამ მოითხოვა სერიოზული და დამოუკიდებელი გამოძიების ჩატარება, რათა დადგინდეს, რამ გამოიწვია ჩრდილოეთ აფრიკაში მდებარე ესპანურ ანკლავში ათიათასობით მიგრანტის მასობრივი გადასვლის მცდელობა და ვინ არის პასუხისმგებელი მომხდარზე.

კვირის დასაწყისიდან დაახლოებით 60 ათასმა ადამიანმა მაროკოდან ესპანეთის ანკლავ სეუტაში ზღვით და ხმელეთით უკანონოდ შეაღწია. სეუტის მოსახლეობა დაახლოებით 85 ათას ადამიანს შეადგენს.

ზღვით გადასვლის მსურველები იყენებდნენ თვითნაკეთ მცურავ საშუალებებს - მათ შორის გასაბერ რგოლებსა და ავტომობილის საბურავებს. 1 აგვისტოს შუადღისთვის ცნობილი იყო, რომ დაღუპულთა რაოდენობა 67 ადამიანს შეადგენდა.

ესპანეთის შინაგან საქმეთა სამინისტროს ინფორმაციით, ესპანეთში ჩასული მაროკოს მოქალაქეების უმეტესობა 30 წლამდე ახალგაზრდები არიან.

მადრიდის ხელისუფლებამ 2021 წლის შემდეგ პირველად გაგზავნა სამხედროები ჩრდილოეთ აფრიკაში მდებარე საკუთარ ანკლავში წესრიგის დასაცავად.

31 ივლისის საღამოს ესპანეთის ხელისუფლებამ განაცხადა, რომ ათიათასობით მიგრანტმა მაროკოს საზღვარი ნებაყოფლობით გადაკვეთა საპირისპირო მიმართულებით და უკან დაბრუნდა. თუმცა, გამოცემა  Deutsche Welle 1 აგვისტოს იტყობინებოდა, რომ ათასობით მიგრანტი კვლავ უარს ამბობდა ანკლავის დატოვებაზე, ხოლო ადგილობრივი მოსახლეობის დიდი ნაწილი სახლებს არ ტოვებდა.

ამჟამად ესპანეთის შინაგან საქმეთა სამინისტრო აცხადებს, რომ ჩასული მიგრანტების „თითქმის ყველა“ უკვე დაბრუნებულია მაროკოში.

ზუსტად რა გახდა მიგრანტების მასობრივი ნაკადის მიზეზი, ჯერჯერობით უცნობია.  AFP  წერს, რომ ესპანეთის პრემიერ-მინისტრმა პედრო სანჩესიმა მომხდარში დაადანაშაულა „კონტრაბანდისტთა მაფიის“ მიერ გავრცელებული ინფორმაცია თითქოს საზღვარი გახსნილი იყო.