უკრაინის საგარეო საქმეთა მინისტრმა ანდრი სიბიჰამ განაცხადა, რომ რუსეთმა ბოლო დღეების განმავლობაში სულ მცირე სამ სამოქალაქო გემს შეუტია. მისი თქმით, თავდასხმების შედეგად ეკიპაჟის წევრებს შორის არიან დაღუპულები და დაშავებულები.
ამის შესახებ სიბიჰამ სოციალურ ქსელ X-ზე დაწერა.
„დღეს უკრაინის საზღვაო დერეფნით შავ ზღვაში არც ერთ გემს არ გაუვლია - სწორედ მოსავლის აღების პიკის პერიოდში. ეს მიზანმიმართული ეკონომიკური და ჰუმანიტარული ტერორია,“ - აღნიშნა სიბიჰამ.
მინისტრმა რუსეთის ქმედებები ირანის მიერ ჰორმუზის სრუტეში ენერგეტიკულ მარშრუტებზე განხორციელებულ თავდასხმებს შეადარა და აღნიშნა, რომ მოსკოვი ახლა მიზანმიმართულად უტევს მსოფლიო სასურსათო ბაზრებს.
„თუ ეს ტერორი გაგრძელდება, აფრიკის, აზიის, ახლო აღმოსავლეთისა და ლათინური ამერიკის მილიონობით ოჯახს შესაძლოა სურსათზე ფასების ზრდა და შიმშილი დაემუქროს.
უკრაინამ 27 ივლისს გაერო-ს უშიშროების საბჭოს საგანგებო სხდომის მოწვევის მოთხოვნით მიმართა. მოვუწოდებთ ყველა სახელმწიფოს, განსაკუთრებით მათ, ვინც უკვე დაზარალდა, დაუყოვნებლივ მოსთხოვონ რუსეთს, შეწყვიტოს შავ ზღვაში თავისუფალი ნაოსნობის წინააღმდეგ მიმართული თავდასხმები. არც ერთ ქვეყანას არ აქვს უფლება, მსოფლიო შიმშილის მძევლად აქციოს. რუსეთის ტერორის შეჩერება მხოლოდ საერთაშორისო ზეწოლით არის შესაძლებელი.“, - წერს სიბიჰა.
ცნობისასთვის, კომპანია Maersk-მა რუსეთის მიერ საპორტო ინფრასტრუქტურაზე გახშირებული თავდასხმების გამო შავი ზღვის ერთ-ერთ პორტში მომსახურების გაწევა დროებით შეაჩერა.
რუსეთის მიერ სამოქალაქო გემებზე თავდასხმების გახშირებამ გემთმფლობელთა ნაწილი აიძულა, თავი შეეკავებინათ უკრაინის პორტებში შესვლისგან. მათმა ნაწილმა უკვე დაჯავშნული რეისები გააუქმა.
მედიის ცნობით, მიუხედავად რუსეთის თავდასხმებისა, 2026 წლის პირველ ნახევარში უკრაინის საზღვაო პორტებმა 42,4 მილიონი ტონა ტვირთი გადაამუშავეს. თუმცა ივლისში რუსული იერიშები მნიშვნელოვნად გააქტიურდა.
უკრაინის აგრარულ ასოციაციაში აცხადებენ, რომ რუსეთის გაძლიერებული თავდასხმების შედეგად ქვეყანამ შავი ზღვის საკვანძო პორტების გავლით მარცვლეულის ექსპორტის შესაძლებლობის დაახლოებით ერთი მესამედი დაკარგა.
