უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტის, დონალდ ტრამპის წარმომადგენლებთან - სტივ უიტკოფთან და ჯარედ კუშნერთან სატელეფონო საუბარი გამართა. მხარეებმა მშვიდობის მისაღწევად დიპლომატიური ძალისხმევის გააქტიურება განიხილეს.
ამის შესახებ უკრაინული მედია იუწყება.
ზელენსკიმ საუბარს კარგი და მნიშვნელოვანი უწოდა და აღნიშნა, რომ უკრაინას სჭირდება „ღირსეული მშვიდობა“, რომლის მისაღწევადაც ის დიდი ხანია მზად არის.
მისი თქმით, უკრაინისა და აშშ-ის გუნდები მჭიდრო კონტაქტში რჩებიან, მათ შორის იმ საკითხებზე მუშაობის გასაგრძელებლად, რომლებიც მხარეებმა განიხილეს.
პრეზიდენტმა ასევე მადლობა გადაუხადა უიტკოფსა და კუშნერს მშვიდობისთვის გაწეული პირადი ძალისხმევისთვის, ხოლო დონალდ ტრამპსა და ამერიკელ ხალხს - უკრაინისთვის მუდმივი მხარდაჭერისთვის.
„ახლახან ვესაუბრე პრეზიდენტ ტრამპის წარმომადგენლებს - სტივ უიტკოფსა და ჯარედ კუშნერს. კარგი და მნიშვნელოვანი საუბარი გვქონდა იმაზე, თუ როგორ გავააქტიუროთ დიპლომატია და დავაახლოოთ მშვიდობა.
მშვიდობა საჭიროა - ღირსეული მშვიდობა, და უკრაინა ამისთვის უკვე დიდი ხანია მზად არის.
ჩვენი გუნდები მჭიდრო კონტაქტში რჩებიან, მათ შორის იმისთვის, რომ გააგრძელონ მუშაობა ყველაფერზე, რაც განვიხილეთ.
მადლობას ვუხდი სტივსა და ჯარედს მშვიდობისთვის გაწეული პირადი ძალისხმევისთვის. მადლიერი ვართ პრეზიდენტი ტრამპისა და ამერიკელი ხალხის უკრაინისადმი მუდმივი მხარდაჭერისთვის“, - განაცხადა ზელენსკიმ.
