რუსეთის კრასნოდარის მხარის ქალაქ არმავირში ნავთობბაზაზე დრონებით თავდასხმის შემდეგ დაახლოებით 800 კვადრატულ მეტრზე ხანძარი გაჩნდა.
ამის შესახებ უკრაინული მედია რუსული გამოცემა „ინტერფაქსსა“ და Telegram-არხ ASTRA-ზე დაყრდნობით იუწყება.
„არმავირმა ერთ-ერთი ყველაზე მასშტაბური თავდასხმა განიცადა - ჩრდილოეთ სამრეწველო ზონაში მდებარე ნავთობბაზას 16-ზე მეტი უპილოტო საფრენი აპარატი დაესხა თავს. ოპერატიული სამსახურების ინფორმაციით, დარტყმის შედეგად ობიექტზე ხანძარი გაჩნდა, რომლის ფართობმაც დაახლოებით 800 კვადრატული მეტრი შეადგინა“, - ნათქვამია ქალაქის ადმინისტრაციის განცხადებაში.
არსებული ინფორმაციით, ხანძრის ლიკვიდაციაში ჩართული იყო ცხრა ერთეული სპეციალური ტექნიკა და საგანგებო სიტუაციების სამინისტროს 40-ზე მეტი თანამშრომელი.
შეგახსენებთ, 22 ივლისის ღამით დრონებით განხორციელებული თავდასხმის შედეგად რუსეთის კრასნოდარისა და სტავროპოლის მხარეებში მდებარე Wildberries-ის ორ მსხვილ სასაწყობე-ლოგისტიკურ ცენტრში ხანძარი გაჩნდა.
