აშშ-ის პრეზიდენტმა დონალდ ტრამპმა განაცხადა, რომ აშშ-სა და ირანს შორის მოქმედი ცეცხლის შეწყვეტის რეჟიმი დასრულებულია. ამის შესახებ მან ნატო-ს სამიტზე, ანკარაში, ჟურნალისტების კითხვების საპასუხოდ განაცხადა.
აშშ-ის პრეზიდენტმა ირანელებს „ბოროტი“ და „ავადმყოფი ადამიანები“ უწოდა.
„ჩემი აზრით, ყველაფერი დასრულებულია. აღარ მსურს მათთან საქმის დაჭერა. ისინი ნაძირლები არიან. ისინი ავადმყოფი ადამიანები არიან. მათ ავადმყოფი ადამიანები მართავენ“, - განაცხადა აშშ-ის პრეზიდენტმა.
მისი თქმით, სიტუაციას ამერიკელ მომლაპარაკებლებთან კიდევ განიხილავს, თუმცა მიაჩნია, რომ თეირანთან შემდგომი მოლაპარაკებები „დროის ფუჭი კარგვაა“.
აშშ-ის პრეზიდენტის განცხადებით, 8 ივლისის ღამეს ამერიკულმა სამხედრო ძალებმა ირანის ტერიტორიაზე „ძალიან ძლიერი დარტყმები“ განახორციელეს.
„ჩვენ ვუთხარით: „წადით და თქვენი დაკრძალვის საქმეებს მიხედეთ“, მაგრამ ამის ნაცვლად, გუშინ გემების დაბომბვა დაიწყეს. ამიტომ, გასულ ღამეს მათ ძალიან ძლიერი დარტყმა მივაყენეთ“, – თქვა ტრამპმა.
ამჟამად ირანში მიმდინარეობს აიათოლა ალი ხამენეის დაკრძალვის ცერემონია.
აშშ-ის ცენტრალური სარდლობის ინფორმაციით, 8 ივლისის ღამეს ამერიკულმა ძალებმა ირანში დაახლოებით 80 სამხედრო ობიექტზე მიიტანეს იერიში. მათივე ცნობით, განადგურდა საჰაერო თავდაცვის სისტემები, რადარები, მართვის პუნქტები, სანაპირო-სარაკეტო კომპლექსები და ისლამური რევოლუციის გუშაგთა კორპუსის 60-ზე მეტი სწრაფმავალი კატარღა ჰორმუზის სრუტის რაიონში.
ირანის სახელმწიფო მედიის ინფორმაციით, აფეთქებები მოხდა ბენდერ-აბასის პორტსი, სირიკის საპორტო ქალაქში, ასევე ქეშმის კუნძულზე
სარდლობის განცხადებით, ოპერაცია პასუხი იყო ჰორმუზის სრუტეში სამ კომერციულ ტანკერზე განხორციელებულ თავდასხმებზე. თეირანი კი ამტკიცებს, რომ აღნიშნული გემები ირანის ხელისუფლებასთან შეუთანხმებელი მარშრუტით გადაადგილდებოდნენ.
გამოცემა Axios-ის ცნობით, დარტყმების ბრძანება პირადად დონალდ ტრამპმა გასცა, რომელიც იმ დროს ანკარაში, ნატო-ს სამიტზე იმყოფებოდა. გამოცემის წყაროების ინფორმაციით, ეს ოპერაცია ჰორმუზის სრუტის კრიზისის დაწყების შემდეგ ყველაზე მასშტაბური იყო.
ამასთან, ცნობილი გახდა, რომ აშშ-მა ირანულ ნავთობზე სანქციები აღადგინა.
