ნორვეგიის ხელისუფლება ჩინეთს მოუწოდებს რუსეთის ხელმძღვანელობასთან არსებული კავშირები გამოიყენოს უკრაინაში ომის მოლაპარაკებების გზით დასრულების ხელშესაწყობად.
ამის შესახებ ნორვეგიის პრემიერ-მინისტრმა იონას გარ სტორემ ისაუბრა. იუწყება Reuters
ნორვეგიის მთავრობის მეთაურმა ეს მოწოდება ოსლოში ჩინეთის საგარეო საქმეთა მინისტრ ვან ისთან შეხვედრის დროს გააკეთა. სტორემ განაცხადა, რომ მოლაპარაკებების დიდი ნაწილი უკრაინაში მიმდინარე ომს დაეთმო.
„ჩინეთი, სავარაუდოდ, ის ქვეყანაა, რომელსაც რუსეთის ხელმძღვანელობასთან ყველაზე უკეთესი და პირდაპირი წვდომა აქვს. ჩვენ ველით, იმედი გვაქვს და მტკიცედ მოვუწოდებთ ჩინეთს, გამოიყენოს ეს არხი“, - განაცხადა ნორვეგიის პრემიერ-მინისტრმა.
მისი თქმით, ევროპასა და ჩინეთს შორის თანამშრომლობისთვის „დიდი პოტენციალი“ არსებობს, თუმცა ის შეზღუდულია პეკინისა და მოსკოვის ურთიერთქმედების გამო.
ნორვეგიის საგარეო საქმეთა მინისტრმა ესპენ ბარტ ეიდემ კი მანამდე განაცხადა, რომ ჩინეთთან დიალოგი უკრაინაში ომის შეწყვეტის შესახებ იყო „კონსტრუქციული და იმედისმომცემი“.
„მე ჩინეთის პრესსპიკერი არ ვარ. არ ვაპირებ მათი სიტყვების ციტირებას, მაგრამ მათ განცხადებებში გარკვეული მინიშნებები არსებობს“, - განაცხადა დიპლომატმა, როდესაც მას ჰკითხეს, მიანიშნა თუ არა ჩინეთმა, რომ დაითანხმებს რუსეთს, დაჯდეს მოლაპარაკებების მაგიდასთან.
ნორვეგიელმა ოფიციალურმა პირებმა განაცხადეს, რომ რუსეთსა და უკრაინას შორის მოლაპარაკებები ყოველგვარი წინაპირობის გარეშე უნდა დაიწყოს - ცეცხლის შეწყვეტით, არსებული ფრონტის ხაზის საფუძველზე.
„ეს, ფაქტობრივად, უკრაინის მხრიდან მნიშვნელოვანი დათმობაა. რადგან ეს მათი ტერიტორიაა“, - განაცხადა ნორვეგიის პრემიერ-მინისტრმა.
