"დემოკრატიული მოძრაობის" წევრს თამარ ზალიშვილის განცხადებით 6 წელია სააკაშვილი ერთსა და იმავე ტყუილ დაპირებებს იძლევა.
„2011 წლის 11 თებერვალს, საქართველოს პარლამენტში პრეზიდენტის, მიხეილ სააკაშვილის წლევანდელი მოხსენება რიგით მეშვიდე წლიური მოხსენებაა. ქართველ ხალხს მოკლე მეხსიერება არ აქვს და კარგად ახსოვს, რომ 2005 წელს წარმოთქმული პრეზიდენტის სიტყვები - „რა ამოცანები დგას დღეს ჩვენს წინაშე: - ეს არის სამუშაო ადგილები, რომლებსაც მექანიკურად ვერ შევქმნით, ანუ ჩვენ ის დარგები უნდა განვავითაროთ, სადაც ყველაზე მეტი სამუშაო ადგილები შეიძლება იყოს. აუცილებელია ტურიზმის განვითარება, სოფლის მეურნეობის პროდუქციის გადამუშავება და სხვ.;... აუცილებელია ახალი საავადმყოფოების აშენება, რადგან ჩვენ სამედიცინო სკოლას ვკარგავთ, რომელიც, პრაქტიკულად, განადგურების პირასაა მისული; ძალიან მნიშვნელოვანია ჩვენი უნივერსიტეტების, მეცნიერების დაფინანსება" და მრავალი სხვა 6 წლის შემდეგაც შეუსრულებელ დაპირებად რჩება. ბევრზე მეტყველებს შემდეგი მონაცემები: 2005 წელს სოფლის მეურნეობის სამინისტროს დამტკიცებული ბიუჯეტი იყო 51,0 მლნ ლარი, ხოლო შინაგან საქმეთა სამინისტროსი - 156,6 მლნ ლარი. 6 წლის შემდეგ, 2011 წელს სოფლის მეურნეობის სამინისტროს ბიუჯეტმა - 69,2 მლნ ლარი შეადგინა (ოდნავ გაიზარდა), ხოლო შინაგან საქმეთა სამინისტროსი - სამჯერ და მეტად გაიზარდა და 566,0 მლნ ლარით განისაზღვრა", - განაცხადა ზაალიშვილმა.
მისი თქმით, შინაგან საქმეთა სამინისტროს კომპეტენციაში შემავალ ღონისძიებებზე მილიონობით ლარი იხარჯება ადგილობრივი თვითმმართველობების მიერ, ხოლო სოფლის მეურნეობის განვითარებაზე პრაქტიკულად არაფერი იხარჯება სოფლის ხელშეწყობის პროგრამიდანაც კი.
