ეკონომიკისა და მდგრადი განვითარების მინისტრის ვერა ქობალიას განმარტებით, მთავრობა და კომპანიებს შორის არსებული წინასწარი შეთანხმებით, ქართულ მხარეს გასაფორმებელი ხელშეკრულების დეტალებზე საუბრის უფლება არ აქვს.

"ელექტრომობილების შეძენაზე მოლაპარაკებები მიმდინარეობს "NISSAN MOTOR COLTD"--სა და "RENAULT s.a.s"-სთან, თუმცა მათი მოთხოვნაა, ვიდრე კონტრაქტი არ იქნება ხელმოწერილი, მანამდე კონკრეტულ ციფრებზე, რაოდენობებზე და თარიღებზე არ ვისაუბროთ და განცხადებები არ გავაკეთოთ. თუმცა გეტყვით, რომ მათ ელექტრომობილების დარგში ყველაზე დიდი წარმატება აქვს და თითქმის ყველა ევროპულმა ქვეყანამ და აზიის ზოგიერთმა სახელმწიფომ "NISSAN MOTOR COLTD"-თან და "RENAULT s.a.s"--თან ხელი მოაწერეს ხელშეკრულებას ელექტრომობილების შესყიდვაზე"- აცხადებს ვერა ქობალია.

მინისტრს ესპანეთის მაგალითი მოყავს, სადაც ანალოგიური პროექტის განხორციელება უკვე დაიწყო.

"მადრიდში, ბარსელონაში და ვალენსიაში ანალოგიურ პროგრამების განხორციელება უკვე დაიწყო და იმედი მაქვს, რომ 2011 წლის ბოლომდე ამ მანქანების ნაწილს შემოვიყვანოთ"" განაცხადა ვერა ქობალიამ.
მინისტრის თქმით, "NISSAN MOTOR COLTD" და "RENAULT s.a.s"- ოთხი ტიპის ელექტრომობილებს აწარმოებენ, რომელთა მინიმალური ღირებულება 5 ათასი ევროა.

რაც შეეხება გაცხადებულ ინფორმაციას თითქოს და იმ ელექტრომობილებს, რომელსაც საქართველოს მთავრობა შეიძენს ადგილზე აეწყობოდა, ვერა ქობალიას თმით აღნიშნული პროექტისა განხორციელება წლის ბოლომდე ვერ ხერხდება. მინისტრი ამბობს, რომ ამ საკითხზე კომპანიებთან მოლაპარაკებები წარმოებს.

"საქართველოს მთავრობა ყოველთვის ვუჭერთ მხარს იმ კომპანიებსა და პროექტებს, რომელის საშუალებას იძლევა, რომ ადგილობრივი მოსახლეობა დასაქმდეს და ამიტომ ვცდილობთ, რომ ნებისმიერი პროდუქტი ავაწყოთ საქართველოში"- განაცხადა ეკონომიკისა და მდგრადი განვითარების მინისტრმა.

შეგახსენებთ, რომ გავრცელებული ინფორმაციით, საქართველოს მთავრობა "რენოსგან" და "ნისანისგანნ" პირველ ეტაპზე 2 ათას ელექტრომობილს შეიძენს. თუმცა მანამდე ელექტრომობილების შემოყვანაზე მთავრობა "NISSAN MOTOR COLTD"-თან და "RENAULT s.a.s"-თან ურთიერთგაგების მემორანდუმს გააფორმებს, რომელსაც საქართველოს მთავრობის სახელით ხელს ეკონომიკისა და მდგრადი განვითარების მინისტრი ვერა ქობალია მოაწერს. გასაფორმებელი ურთიერთგაგების მემორანდუმის პროექტის განხილვა, გასულ კვირას მთავრობის სხდომაზე იგეგმებოდა, თუმცა საკითხის განხილვას მინისტრთა კაბინეტი სავარაუდოდ მთავრობის მომავალ სხდომაზე მიუბრუნდება.

მთავრობაში განმარტავენ, რომ "რენო" და "ნისანი" მსოფლიოში
ავტომანქანების წამყვან მწარმოებელ კომპანიებს წარმოადგენენ და იგივე ტემპს ელექტრონული ავტომანქანების წარმოებისა და რეალიზაციაშიც ინარჩუნებენ.

მთავრობაში აცხადებენ იმასაც, რომ ელექტრონული ავტომანქანების შემოყვანა და გავრცელება წარმოადგენს ერთ-ერთ საუკეთესო საშუალებას CO2 გამოყოფის შესამცირებლად.