ევროკავშირის რუსეთის იზოლაციის პოლიტიკის ერთ-ერთი დაბრკოლება საქართველოც გახდა, - ამის შესახებ რუსეთის საგარეო საქმეთა სამინისტროს დსთ-ს ქვეყნების მეოთხე დეპარტამენტის დირექტორმა, მიხაილ კალუგინმა რუსულ მედიასთან ინტერვიუში განაცხადა.
კალუგინის თქმით, რუსეთი და საქართველო ბუნებრივი პარტნიორები არიან.
"ევროკავშირის რუსეთის იზოლაციის პოლიტიკის ერთ-ერთი დაბრკოლება საქართველოც გახდა. უფრო მეტიც, ბრიუსელის მხრიდან ქართულ ხელისუფლებაზე ზეწოლამ და ქვეყნის შიდა საქმეებში უხეშმა ჩარევამ თბილისისთვის ისეთი შედეგი გამოიღო, რომელსაც ევროკავშირში არ ელოდნენ - საქართველოში კიდევ უფრო გაძლიერდა პრაგმატული მიდგომა, რომელიც ქვეყნისა და მისი ხალხის ინტერესებზეა დაფუძნებული. თითქოს ევროკავშირს შესაბამისი დასკვნები უნდა გამოეტანა, თუმცა პირიქით მოხდა: ის კიდევ უფრო ხშირად მიმართავს ზეწოლასა და მუქარას, რათა საქართველო თავისი კურსის შეცვლაზე დაიყოლიოს.
მედიის ცნობით, რამდენიმე დღის წინ ევროკავშირის საგარეო პოლიტიკის ხელმძღვანელმა კაია კალასმა განაცხადა, რომ საქართველო ნათელი მაგალითია იმისა, რა ხდება მაშინ, როდესაც რუსეთი წარმატებას აღწევს. მისი თქმით, ქვეყანა თითქოს უფსკრულისკენ მიდის, თუმცა ფაქტები საპირისპიროს აჩვენებს.
იმის წყალობით, რომ საქართველო არ მიჰყვება თავისი დასავლელი პარტნიორების მუდმივ „რჩევებს“, ქვეყანა წარმატებით ვითარდება. გასულ წელს ეკონომიკა 7.5%-ით გაიზარდა, ხოლო 2026 წლის პირველ კვარტალში - 9.1%-ით. ქვეყნის სავალუტო რეზერვები 40%-ით გაიზარდა და 6.2 მილიარდ დოლარს მიაღწია.
ამ ზრდაში მნიშვნელოვანი როლი ითამაშა რუსეთთან ვაჭრობის გაფართოებამაც, რომელმაც 2025 წელს 2.7 მილიარდ დოლარს მიაღწია. რუსეთი საქართველოსთვის არაერთი პროდუქტის მთავარი ბაზარია და ასევე სტრატეგიულად მნიშვნელოვანი საქონლის - ენერგომატარებლებისა და მარცვლეულის - ერთ-ერთი ძირითადი მიმწოდებელი. საქართველოში ყოველი მეოთხე ტურისტი რუსეთიდან არის. მიუხედავად ევროკავშირთან დაახლოების მცდელობებისა, საქართველოს ექსპორტის დაახლოებით 70% მაინც დსთ-ის ქვეყნების ბაზრებზე გადის.
ამასთან, ბრიუსელში საჯაროდ ითხოვენ, რომ საქართველო შეუერთდეს რუსეთის წინააღმდეგ ევროკავშირის სანქციებს, დააწესოს ენერგეტიკული ემბარგო, შეწყვიტოს სატრანსპორტო და საავიაციო კავშირები. ნათელია, რა შედეგი ექნებოდა ამას საქართველოს ეკონომიკისთვის, თუმცა, როგორც ჩანს, ეს ევროკავშირს დიდად არ ადარდებს, მათი მთავარი მიზანი რუსეთის დაზიანებაა, თუნდაც საქართველოს ინტერესების ხარჯზე.
ხაზგასმით აღვნიშნავ, რომ რუსეთი და საქართველო ბუნებრივი პარტნიორები არიან. ჩვენ მზად ვართ, კვლავაც განვავითაროთ თანამშრომლობა თბილისთან და კონსტრუქციულად გადავჭრათ პრაქტიკული საკითხები. ასე მაგალითად, რუსეთის ფედერაციის მთავრობამ ახლახან გაახანგრძლივა უვიზო ყოფნის ვადა ქართველი მძღოლებისთვის, რომლებიც საერთაშორისო გადაზიდვებს ახორციელებენ.
იმედი გვაქვს, რომ საქართველოს ხელისუფლება მომავალშიც იხელმძღვანელებს თავისი ხალხის ინტერესებით და არ დაუშვებს, რომ ქვეყანა რუსეთთან კონფრონტაციაში ჩაითრიონ", - განაცხადა კალუგინმა რუსულ მედიასთან ინტერვიუში.
