საფრანგეთისა და გაერთიანებული სამეფოს ლიდერებმა - ემანუელ მაკრონმა და კირ სტარმერმა პარიზში გამართულ შეხვედრაზე განაცხადეს, რომ ჰორმუზის სრუტეში ნაოსნობის თავისუფლების უზრუნველსაყოფად მისიის შექმნიან.
საფრანგეთმა და გაერთიანებულმა სამეფომ განაცხადეს, რომ უხელმძღვანელებენ მრავალეროვან მისიას ჰორმუზის სრუტეში ნაოსნობის თავისუფლების უზრუნველსაყოფად „როგორც კი პირობები ამის საშუალებას მისცემთ“.
ამის შესახებ პარიზში გამართული საერთაშორისო კონფერენციის შემდეგ განაცხადეს გაერთიანებული სამეფოს პრემიერ-მინისტრმა კირ სტარმერმა და საფრანგეთის პრეზიდენტმა ემანუელ მაკრონმა. კონფერენცია ჰორმუზის სრუტის უსაფრთხოებას მიეძღვნა.
სტარმერის თქმით, მისია „მხოლოდ მშვიდობიანი და თავდაცვითი ხასიათის იქნება“ და მიზნად ისახავს კომერციული საზღვაო გადაადგილების უსაფრთხოების უზრუნველყოფას და განაღმვით სამუშაოებში მხარდაჭერას.
მისივე განცხადებით, უკვე ათზე მეტმა ქვეყანამ გამოთქვა მზადყოფნა, მისიის მხარდაჭერაზე.
ბრიტანეთისა და საფრანგეთის ლიდერებმა ასევე აღნიშნეს, რომ სამხედრო დაგეგმვის სპეციალისტები საკითხს მომავალ კვირას ლონდონში განიხილავენ.
პარიზის შეხვედრას, რომელიც ელისეის სასახლეში გაიმართა, ესწრებოდნენ გერმანიის კანცლერი ფრიდრიხ მერცი და იტალიის პრემიერ-მინისტრი ჯორჯია მელონი, ხოლო ონლაინ ფორმატით მონაწილეობდა დაახლოებით 50 ქვეყნის ლიდერი და საერთაშორისო ორგანიზაციების წარმომადგენლები.
თავის მხრივ, გერმანიის კანცლერმა ფრიდრიხ მერცმა აღნიშნა, რომ გერმანია მზად არის მონაწილეობა მიიღოს ჰორმუზის სრუტის უსაფრთხოების უზრუნველყოფის ოპერაციაში.
მისი თქმით, შესაძლო ამოცანებს შორის განიხილება განაღმვითი სამუშაოები და საზღვაო დაზვერვა.
ამასთან, როგორც მერცმა განაცხადა, ჯარების განთავსების წინაპირობა პირველ რიგში ახლო აღმოსავლეთში ომის დასრულებაა. გარდა ამისა, საჭიროა მყარი სამართლებრივი საფუძველი, მაგალითად გაერო-ს უშიშროების საბჭოს რეზოლუცია.
კანცლერის თქმით, „სასურველია“ ამ მისიაში აშშ-ის მონაწილეობაც.
კონფერენციის მონაწილეებმა დადებითად შეაფასეს ირანთან დაკავშირებული კონფლიქტის დარეგულირებისკენ გადადგმული ნაბიჯები, ასევე ლიბანში მოქმედი და ირანის მხარდაჭერილი რადიკალური დაჯგუფება „ჰეზბოლას“ საკითხში განვითარებული მოვლენები — მათ შორის ლიბანში გამოცხადებული 10-დღიანი ცეცხლის შეწყვეტა და ირანის მიერ ჰორმუზის სრუტის დროებითი გახსნა.
საფრანგეთის პრეზიდენტის ემანუელ მაკრონის განცხადებით, ეს მოვლენები იმედის საფუძველს ქმნის, თუმცა სიფრთხილე კვლავ აუცილებელია.
მისი თქმით, ჰორმუზის სრუტის დროებით გახსნა კომერციული გემებისთვის სწორი მიმართულებით გადადგმული ნაბიჯია, თუმცა საბოლოო მიზანი უნდა იყოს საზღვაო გადაადგილების თავისუფლების სრულად აღდგენა ამ მნიშვნელოვან ნავთობის მარშრუტზე.
კონფერენციის მონაწილეებმა ასევე განაცხადეს, რომ ყველა მხარისგან მოითხოვენ ჰორმუზის სრუტის „სრული, დაუყოვნებელი და უპირობო გახსნას“.
გაერთიანებული სამეფოს პრემიერ-მინისტრმა კირ სტარმერმა აღნიშნა, რომ ირანისა და აშშ-ის განცხადება გზის გახსნის შესახებ უნდა გადაიქცეს „გრძელვადიან და რეალურად განხორციელებად გეგმად“.
გერმანიის კანცლერმა ფრიდრიხ მერცმა განაცხადა, რომ ჰორმუზის სრუტის გახსნა უნდა იყოს „სანდო“ და „მუდმივი“. მან ასევე დროებითი გახსნის გადაწყვეტილებას „კარგი ამბავი“ უწოდა, თუმცა აღნიშნა, რომ ეს უნდა განხორციელდეს საერთაშორისო საზღვაო სამართლის სრული დაცვით და ყოველგვარი შეზღუდვის გარეშე.
