ევროკავშირი გეგმავს უკრაინას გამოუყოს დაახლოებით 2.5–2.7 მილიარდი ევრო მას შემდეგ, რაც ქვეყნის პარლამენტმა გასულ კვირას საჭირო რეფორმები დაასრულა. ამის შესახებ ევროკავშირის გაფართოების საკითხებში კომისარმა მარტა კოსმა განაცხადა, იუწყება Reuters.

კოსის თქმით, თანხა გამოიყოფა ევროკავშირის უკრაინის ფონდისგან, რომელიც ცალკეა 90 მილიარდი ევროს კრედიტისგან.

„არსებობს უკრაინისთვის გეგმა, რომელიც მოიცავს 173 რეფორმას, რომლებიც მათ უნდა გაატარონ… და თუ ისინი ამას შეასრულებენ, ჩვენ შევძლებთ მათთვის თანხების გამოყოფას“, — განაცხადა ევროკავშირის გაფართოების საკითხებში კომისარმა სააგენტო Reuters-თან საუბრისას.

მისი თქმით, ევროკავშირი აუცილებლად გადასცემს უკრაინას 90 მილიარდი ევროს კრედიტს.

მან ასევე დადებითად შეაფასა უნგრეთში ჩატარებული არჩევნების შედეგები, სადაც ადრე ბლოკირებული იყო ევროკავშირის გაცილებით დიდი კრედიტი უკრაინისთვის.

„შანსი, რომ უკრაინამ მიიღოს 90 მილიარდი ევროს კრედიტი, არის 100% და ჩვენ უკვე ვაწარმოებთ მოლაპარაკებებს. ჩვენი პრეზიდენტი ესაუბრა უნგრეთის მომავალ, შესაძლო ახალ პრემიერ-მინისტრს პეტერ მადიარს და ვფიქრობ, რომ ჩვენ ამას ძალიან მალე განვახორციელებთ. ძალიან ბედნიერი ვარ, რადგან ბოლოს და ბოლოს შემიძლია შევასრულო დაპირება — ევროკავშირს შეუძლია შეასრულოს ის, რაც დაჰპირდა. ზოგჯერ ამას დრო სჭირდება, დიახ, ნამდვილად. მაგრამ რასაც ვპირდებით, ვასრულებთ“, — განაცხადა კოსმა.