კრემლში განაცხადეს, რომ უკრაინაში ომის მოსაგვარებლად სამმხრივი მოლაპარაკებების პროცესი ამჟამად შეჩერებულია, თუმცა რუსეთი აგრძელებს ინფორმაციის გაცვლას შეერთებულ შტატებთან.
ამის შესახებ კრემლის პრესსპიკერმა დმიტრი პესკოვმა განაცხადა.
პესკოვმა განაცხადა, რომ სამი ქვეყნის მონაწილეობით მოლაპარაკებები ამჟამად შეჩერებულია.
„ამერიკელებს ბევრი სხვა საქმე აქვთ გასაკეთებელი და ცხადია, რა არის ეს. ამის გამო, ამჟამად სამმხრივ ფორმატში შეხვედრა რთულია“, - განუცხადა მან ჟურნალისტებს.
ამის მიუხედავად, პესკოვის თქმით, უკრაინელები ამერიკელებთან საუბარს აგრძელებენ.
„ჩვენ ასევე ვაგრძელებთ ინფორმაციის გაცვლას ამერიკელებთან ჩვენს ხელთ არსებული არხებით“, - აღნიშნა მან.
პესკოვს კითხვა დაუსვეს, შეძლებს თუ არა აშშ-ის პრეზიდენტის სპეციალური წარმომადგენლის სტივ უიტკოფის და ამერიკელი ბიზნესმენის ჯარედ კუშნერის კიევში ვიზიტი მოლაპარაკებების პროცესის გამოცოცხლებას.
პესკოვს ასევე ჰკითხეს, იცოდა თუ არა კრემლმა აღდგომის შემდეგ ასეთი ვიზიტის მზადების შესახებ.
„ჩვენ არ გვაქვს სარწმუნო ინფორმაცია იმის შესახებ, რომ ეს (ვიზიტი) იგეგმება“, - განაცხადა პესკოვმა.
ცნობისათვის, უკრაინის პრეზიდენტის ადმინისტრაციის ხელმძღვანელი კირილო ბუდანოვი აღდგომის შემდეგ კიევში ამერიკული დელეგაციის ჩასვლას ელოდება.
მანამდე, უკრაინის პრეზიდენტმა ვოლოდიმირ ზელენსკიმ ამერიკული დელეგაცია კიევში მიიწვია.
