აშშ-ის პრეზიდენტი დონალდ ტრამპი ევროპელ მოკავშირეებს დაემუქრა, რომ შეწყვეტს უკრაინისთვის PURL-ის პროგრამის ფარგლებში იარაღის მიწოდებას, თუ ისინი არ შეუერთდებიან ჰორმუზის სრუტის განბლოკვის ოპერაციას. ამის შესახებ Financial Times იუწყება.
აღნიშნულია, რომ გასულ თვეში აშშ-ის პრეზიდენტმა ნატო-ს მოკავშირეებს ირანის მიერ დაბლოკილი ჰორმუზის სრუტის ხელახლა გახსნაში დახმარება სთხოვა, თუმცა ევროპული დედაქალაქებისგან უარი მიიღო.
დისკუსიების შესახენ ინფორმირებული სამი ოფიციალური პირის თქმით, ტრამპმა მათ მუქარით უპასუხა, რომ შეაჩერებდა აშშ-ის მიერ უკრაინისთვის იარაღის მიყიდვას ალიანსის მიერ დაფინანსებული PURL-ის პროგრამის ფარგლებში.
შედეგად, ნატო-ს გენერალური მდივნის, მარკ რუტეს მოწოდებით, ქვეყნების ჯგუფმა, მათ შორის ალიანსის ძირითადმა წევრებმა, საფრანგეთმა, გერმანიამ და გაერთიანებულმა სამეფომ, 19 მარტს გამოაქვეყნეს ნაჩქარევად შეთანხმებული განცხადება, რომელშიც აღუთქვეს მზადყოფნა, „შეერთებოდნენ ძალისხმევას“ სრუტოს უსაფრთხოდ გავლის უზრუნველსაყოფად.
აღნიშნულია, რომ განცხადების გამოქვეყნებამდე რუტემ მონაწილეობა მიიღო ტრამპთან და აშშ-ის სახელმწიფო მდივან მარკო რუბიოსთან არაერთ სატელეფონო საუბარში.
წყაროს ცნობით, ნატო-ს გენერალურმა მდივანმა საფრანგეთთან, გერმანიასთან და დიდ ბრიტანეთთან სატელეფონო საუბრისას განმარტა, რომ ტრამპი „საკმაოდ ისტერიული“ იყო ევროპელების მიერ ჰორმუზის სრუტის დაცვაში დახმარებაზე უარის გამო.
ამასთან დაკავშირებით კომენტარის გაკეთებისას, ბრიტანელმა ოფიციალურმა პირებმა არ უარყვეს, რომ ვაშინგტონი უკრაინის დახმარების შეწყვეტით დაიმუქრა, თუ ნატო-ს ქვეყნები ძალისხმევას არ გააძლიერებდნენ.
