ამერიკის შეერთებულ შტატებში, ვირჯინიის შტატის ქალაქ ნორფოლკში, Old Dominion-ის უნივერსიტეტში „ისლამური სახელმწიფოს“ მხარდამჭერმა ცეცხლი გახსნა, რის შედეგადაც ერთი ადამიანი დაიღუპა და ორი დაშავდა.

გამოძიების ფედერალური ბიურო ინციდენტს ტერორისტულ აქტად იძიებს. ინფორმაციას The Washington Post ავრცელებს.

თავდამსხმელი აშშ-ის ნატურალიზებული მოქალაქე მოჰამედ ბეილორ ჯალოჰია.

ხუთშაბათს, ადგილობრივი დროით დაახლოებით 10:40 საათზე, მან ცეცხლი გახსნა Constant Hall-ის სასწავლო კორპუსში.

გამოძიების ფედერალური ბიუროს  სპეციალური აგენტის, დომინიკ ევანსის თქმით, კაცმა ცეცხლის გახსნამდე „ალაჰ აკბარი“ დაიყვირა.

სროლის შედეგად ერთი ადამიანი დაიღუპა და ორი დაშავდა. ერთ-ერთი დაშავებული კრიტიკულ მდგომარეობაშია.

გავრცელებული ინფორმაციით, სტუდენტებმა თავდამსხმელის გაუვნებელყოფა პოლიციის მოსვლამდე მოახერხეს. ადგილზე მისულ სამართალდამცველებს ეჭვმიტანილი გარდაცვლილი დახვდათ.

გამოძიების ფედერალური ბიუროს განმარტებით,, ის ცეცხლსასროლი იარაღით მიყენებული ჭრილობისგან არ მომკვდარა, თუმცა სიკვდილის ზუსტი მიზეზი არ დაუსახელებიათ.