"ხალხში გაჩნდა განცდა, რომ სახელმწიფოს მხოლოდ დასჯა შეუძლია და თანამშრომლობა - არა. თუმცა, ბუნებრივია, კანონის აღსრულება არაკორუმპირებული მეთოდებით, გულისხმობს სიმკაცრეს", - ამის შესახებ საქართველოს პრეზიდენტმა პარლამენტში ყოველწლიური მოხსენებით გამოსვლისას განაცხადა და განმარტა, რომ მთავრობამ მოსახლეობისთვის მიცემული პირველი პირობა - ქვეყანა კორუფციის გარეშე - შეასრულა.
"ჩვენი მთავარი მიზანი იყო ის, რომ გადაგველახა კორუფციული ბარიერი და მიგვეღწია იმისთვის, რომ ფულის ამკრეფი სახელმწიფო სტრუქტურები იმუშავებდნენ კორუფციიის გარეშე და იხელმძღვანელებდნენ კანონის პრინციპებით. ეს არავის სასაცილოდ არ ჰყოფნიდა 1999 წელს, როცა მე ვაწარმოებდი ვაკეში საარჩევნო კამპანიას "საქართველო კორუფციის გარეშე". დღეს შემიძლია ვთქვა, რომ ჩვენი მაშინდელი დაპირება შესრულებულია. საქართველო არის კორუფციის გარეშე", - განმარტა სააკაშვილმა, რომლის შეფასებითაც, ქართული ფისკალური ინსტიტუტები ყველა საერთაშორისო კვლევის მიხედვით, დღეს ყველაზე არაკორუმპირებულია.
ქვეყნის პირველი პირის თქმით, ყველაფერს აქვს გვერდითი ეფექტი და გამონაკლისი არ აღნიშნული შემთხვევა აღმოჩნდა, რაც იმაში გამოიხატება, რომ ქვეყანამ უმკაცრესი კანონები მიიღო.
"არაკორუმპირებული სისტემის შექმნით მივიღეთ საკმაოდ მკაცრი, გადაცდომებისა და შეცდომებებისადმი სრულიად შეუწყნარებელი, არამოქნილი სისტემა, რომელიც თავისთავად გაზარმაცდა კიდეც თავის არამოქნილობაში. გაუჩნდა ყოვლისშემძლეობის განცდა. ამის გამო განჩდა განცდა, რომ სახელმწიფოს მხოლოდ დასჯა შეუძლია და არ შეუძლია თანამშრომლობა. თუ გავითვალისწინებთ, რომ დღეს ჩვენი სახელმწიფოებრიობის პირველ ნაბიჯებს ვდგამთ, ამისთვის არავინ არ არის დასაძრახი. მადლობის გარდა არაფერი გვეთქმის იმ ხალხისადმი, ვინც მიაღწია გამართულ მუშაობას. ბუნებრივია, კანონის აღსრულება არაკორუმპირებული მეთოდებით, გულისხმბს სიმკაცრეს", - დასძინა სააკაშვილმა.
