2012 წლიდან საქართველო ადგილობრივი წარმოების სიმინდის ექსპორტს რეგიონის ქვეყნებში დაიწყებს.
ამის შესახებ განცხადება სოფლის მეურნეობის მინისტრმა ბაკურ კვეზერელმა, პარლამენტში აგრარული კომიტეტის სხდომაზე გააკეთა.
მინისტრის თქმით, 2012 წლიდან იქნება იმის საშუალება, რომ 25 პროცენტიანი იმპორტით ჩანაცვლდეს და იმავდროულად ქვეყანამ სიმინდის ექსპორტზე გატანაც დაიწყოს.
"2011 წელი იქნება ის წელი, როცა ქვეყანა მოახერხებს იმპორტირებული სიმინდის ჩანაცვლებას, ხოლო 2012 წლიდან ექსპორტი დაიწყება. ვმუშაობთ ასევე იმაზეც, რომ 2012 წელს ყველა სოფელში, რაც შეიძლება მეტ ფართობზე დაითესოს სიმინდი, რადგან ქვეყანას აქვს საშუალება, რომ მხოლოდ სიმინდი 260 ათას ჰექტარზე იყოს დათესილი. საიდანაც შეიძლება იმ რაოდენობის მოსავლის მოყვანა, რომ 1 მილიონი ტონა სიმინდი ექსპორტზეც გავიტანოთ. ეს ყველაფერი კი ქვეყანაში შემოიტანს ახალ ინვესტიციებს და რეგიონში თამაშის ახალ წესებს განსაზღვრავს", - განაცხადა კვეზერელმა.
მისი თქმით, 2012 წლიდან შესაძლებელი გახდება, რომ საქართველომ ღირსეული კონკურენცია გაუწიოს უკრაინას, რომელიც დღეისათვის სიმინდის ექსპორტიორია და უკრაინიდან გამოტანილი სიმინდის ტრანსპორტირება საქართველოს ტერიტორიის გავლით ხდება.