საქართველოს ეკონომიკისა და მდგრადი განვითარების სამინისტრო აგრძელებს პროგრამას, რომელიც მიმართულია საქართველოში IT საინკუბაციო გარემოს შესაქმნელად კონკურენტული სტარტაპების გაჩენის ხელშეწყობისკენ. 10 თებერვალს გაიხსნა IT Startup დღეების მე-2 სესია და სპეციალურად ამ პროექტისთვის შეიქმნა ვებგვერდი www.itstartups.ge, სადაც მოხდება ღონისძიებაში მონაწილეობის მსურველთა რეგისტრაცია. ვებგვერდის პრეზენტაცია სამინისტროს კავშირგაბმულობის, საინფორმაციო ტექნოლოგიებისა და ინოვაციების დეპარტამენტის უფროსმა, ირაკლი ქაშიბაძემ გამართა.
პროექტის მიზანი საქართველოში IT ინოვაციების ხელშეწყობაა. მის ფარგლებში სამინისტრო ზრუნავს, რომ კომპანიების ჩამოყალიბებასა და ახალი პროექტების დანერგვისთვის სათანადო გარემო შეიქმნას და IT Startup პროექტები და დამწყები ინტერნეტკომპანიები კონკურენტუნარიანები გახდნენ როგორც ადგილობრივ, ასევე საერთაშორისო ბაზარზე. პროექტში მონაწილეობა დააინტერესებს პროგრამისტებს, ვებდიზაინერებს, მარკეტინგის და ბიზნესის სპეციალისტებს, რომლებიც მოწონებული იდეის გარშემო უნდა გაერთიანდნენ.
წინა სესიისგან განსხვავებით, აღნიშნულ რიგით მე-2 ღონისძიებაში ინტერნეტ პროექტთან დაკავშირებით იდეების წარდგენა ნებისმიერი სპეციალობის თუ ასაკის ადამიანებს შეეძლებათ.
"IT Startup დღეების ფარგლებში დაგეგმილია კონსულტაციები იდეის მფლობელებისთვის. იდეის მფლობელებს მიეცემათ შესაძლებლობა წარადგინონ თავიანთი პროექტები სპეციალისტების წინაშე და შექმნან გუნდი, მიიღონ უფასო ინტერნეტსივრცე პროექტის განსათავსებლად და მცირე დროის შემდეგ, დაახლოებით 1 თვეში უკვე გარკვეულ დონეზე დამუშავებული პროექტით წარდგნენ ინვესტორების წინაშე'', - განაცხადა ქაშიბაძემ
IT Startup დღეების პირველი ღონისძიების ფარგლებში 20 იდეიდან ინვესტორებმა 4 პროექტი ამოარჩიეს და მათთან წარმატებულად თანამშრომლობენ.
