"დემოკრატიული მოძრაობის" მტკიცებით, ივანე ჯავახიშვილის სახელობის თბილისის სახელმწიფო უნივერსიტეტის პირველ კორპუსს საპრივატიზაციოდ ამზადებენ.
"საუბარია იმ შენობის გაყიდვაზე, რომელიც არის ქართული ეროვნული თვითშეგნების შენარჩუნებისა და გაძლიერების, თავისუფლებისა და სულიერების სიმბოლო და რომლის ფორმა (გარეგნული სახე) შეუძლებელია განხილულ იქნეს ამ შინაარსისგან განცალკევებით. მიგვაჩნია, რომ ამ ინფორმაციის გავრცელება ხელისუფლების პიარტექნოლოგიების გამოვლინებაა და ემსახურება საზოგადოებრივი აზრის მომზადება-შეგუებას", - განაცხადა ბურჯანაძის თანაგუნდელმა თამარ ზაალიშვილმა დღეს გამართულ პრესკონფერენციაზე.
"დემოკრატიული მოძრაობა" მიმართავს საქართველოს ხელისუფლებას, ოფიციალურად განაცხადოს, რომ ივანე ჯავახიშვილის სახელობის თბილისის სახელმწიფო უნივერსიტეტის პირველი კორპუსი და მასთან დაკავშირებული ისტორიულად ჩამოყალიბებული გარემო ხელშეუხებელია.
"გარდა ამისა, ჩვენ, "დემოკრატიულ მოძრაობას", გადაუდებელ აუცილებლობად მიგვაჩნია, მიღებულ იქნეს ცალკე კანონი "ივანე ჯავახიშვილის სახელობის თბილისის სახელმწიფო უნივერსიტეტის შესახებ", რომლითაც შეიქმნება უნივერსიტეტის არსებობისა და მისი ქონების დაცვის საკანონმდებლო გარანტიები, განისაზღვრება უნივერსიტეტის საკუთრებაში, ხაზს ვუსვამთ საკუთრებაში და არა სარგებლობასა და მფლობელობაში არსებული ქონება, მათ შორის, უნივერსიტეტის პირველი კორპუსი, რომლის გასხვისებაც დაუშვებლად გამოცხადდება", - განმარტა ზაალიშვილმა.
