საქართველოში მთავრობის მზარდ ავტორიტარულ მეთოდებს მოჰყვა იანვარში ქართველი ჟურნალისტის, მზია ამაღლობელის დაპატიმრება, - ამის შესახებ აღნიშნულია ანგარიშში, რომელსაც ორგანიზაცია „რეპორტიორები საზღვრებს გარეშე“ (RSF) აქვეყნებს.
ანგარიშში წელს პირველად მოხვდა საქართველო იმ ქვეყნების ჩამონათვალში, რომლებსაც დაპატიმრებული ჟურნალისტები ჰყავს.
“ქართველი ჟურნალისტს და დამოუკიდებელი მედიაგამოცემების - „ბათუმელებისა“ და „ნეტგაზეთის“ თანადამფუძნებელ მზია ამაღლობელს, რომელიც 2025 წლის იანვარში აშკარად უსაფუძვლო და არაპროპორციული ბრალდებებით დააკავეს, 2025 წლის 6 აგვისტოს ორწლიანი პატიმრობა მიუსაჯეს მრავალი პროცედურული დარღვევით მიმდინარე უსამართლო სასამართლო პროცესების შემდეგ. ის პირველი ქალი ჟურნალისტია, რომელიც ქვეყნის მიერ დამოუკიდებლობის მოპოვების შემდეგ პოლიტიკური მოტივით დააპატიმრეს. ეს ყოფილ საბჭოთა რესპუბლიკაში ავტორიტარიზმისკენ სერიოზული გადახრის ნიშანია”, – წერს ავტორიტეტული საერთაშორისო ორგანიზაცია “რეპორტიორები საზღვრებს გარეშე” თავის ყოველწლიურ ანგარიშში.
RSF-ის 2025 წლის შემაჯამებელი ანგარიში მიმოიხილავს ჟურნალისტთა უფლებრივ მდგომარეობას მსოფლიოში, მკვლელობებსა და დაპატიმრებებს პროფესიული მოვალეობის გამო.
“მდგომარეობა ისეთ ქვეყნებში, როგორებიცაა რუსეთი, საქართველო, აზერბაიჯანი და ბელარუსი, ცხადყოფს სერიოზულ საფრთხეებს, რომლებიც პრესის თავისუფლებას ემუქრება ყოფილი საბჭოთა ბლოკის ქვეყნებში. საქართველოში მთავრობის მზარდ ავტორიტარულ მეთოდებს მოჰყვა იანვარში მქართველი ჟურნალისტის, მზია ამაღლობელის დაპატიმრება. აზერბაიჯანში ამჟამად 25 ჟურნალისტი იმყოფება გისოსებს მიღმა. რუსეთი ახლა მეორე ადგილს იკავებს მსოფლიოში დაპატიმრებული ჟურნალისტების რაოდენობით. 2025 წლის 1 დეკემბრის მდგომარეობით 48 მედიაპროფესიონალია დაპატიმრებული რუსეთში, რომელთაგან 26 უკრაინელია”, – წერს “რეპორტიორი საზღვრებს გარეშე”.
ანგარიშის თანახმად, აზერბაიჯანში ამჟამად 25 ჟურნალისტი ციხეშია. რუსეთი მეორე ადგილს იკავებს მსოფლიოში დაპატიმრებული ჟურნალისტების რაოდენობით და 2025 წლის 1-ელი დეკემბრის მონაცემებით, გისოსებს მიღმა მყოფი 48 მედიაპროფესიონალისგან 26 უკრაინელია.
ამასთან, დოკუმენტის თანახმად, ბოლო ერთი წლის განმავლობაში 22 ქვეყანაში 67 ჟურნალისტი მოკლეს, მათგან სულ მცირე 53 ომის ან კრიმინალური ქსელების მსხვერპლია.
„ბოლო 12 თვის განმავლობაში მოკლული ჟურნალისტების დაახლოებით ნახევარი (43%) ღაზაში ისრაელის ძალებმა მოკლეს. უკრაინაში რუსეთის არმია ასევე აგრძელებს ადგილობრივი და უცხოელი რეპორტიორების მიზანში ამოღებას. სუდანი პროფესიისთვის განსაკუთრებით საშიშ ომის ზონად იქცა. მექსიკაში ორგანიზებული დანაშაული კვლავ რჩება ჟურნალისტების სიკვდილიანობის საგანგაშო ზრდის მთავარ მიზეზად. 2025 წელს ბოლო სამი წლის განმავლობაში ყველაზე მეტი, 9 ჟურნალისტი დაიღუპა“, - აღნიშნულია ანგარიშში.
ამასთან, დოკუმენტის თანახმად, ამჟამად მთელ მსოფლიოში 503 ჟურნალისტია დაკავებული.
„ჟურნალისტებისთვის მსოფლიოში ყველაზე დიდი ციხე კვლავ ჩინეთია (121), მეორე ადგილზეა რუსეთი (48), სადაც სხვა სახელმწიფოებთან შედარებით ყველაზე მეტი უცხოელი ჟურნალისტია დაპატიმრებული(26 უკრაინელი ჟურნალისტი). მესამე ადგილზე მიანმარი (47) იმყოფება“, - აღნიშნულია ანგარიშში.
