მოლდოვაში პიროტექნიკით შეიარაღებული დნესტრისპირელები დააკავეს, რომლებიც არჩევნების შემდეგ არეულობის მოწყობას გეგმავდნენ.
მოლდოვის პოლიციის ცნობით, სამართალდამცველებმა პიროტექნიკით შეიარაღებული პირები დააკავეს. ამის შესახებ ინფორმაცია ჟურნალისტებს კვირა საღამოს მიაწოდეს.
მოლდოვის პოლიციის ინფორმაციით, შეიარაღებული პირები არჩევნების შემდეგ არეულობის მოწყობას გეგმავდნენ. მასობრივი დესტაბილიზაციისა და არეულობის მომზადების ბრალდებით აღძრული სისხლის სამართლის საქმის ფარგლებში, დაკავებულია სამი ადამიანი, რომლებსაც პოლიცია დნესტრისპირეთის უსაფრთხოების ძალების თანამშრომლებად მიიჩნევს.
„დაკავებისა და ჩხრეკის დროს აღმოჩენილი იქნა არაერთი ნივთი, მათ შორის პიროტექნიკა და აალებადი ნივთიერებები, რომლებიც ხალხში პანიკისა და ქაოსის შესაქმნელად იყო განკუთვნილი“, - ნათქვამია პოლიციის განცხადებაში.
მანამდე მოლდოვის პოლიციაში განაცხადეს, რომ მიიღეს ინფორმაცია ადამიანთა გარკვეული ჯგუფების შესახებ, რომლებიც საპარლამენტო არჩევნების შემდეგ დედაქალაქში დაანონსებული აქციის ფარგლებში, არეულობისა და დესტაბილიზაციის ორგანიზებას აპირებენ.
