ბრიტანული გამოცემა "Conservativehome": -ის შეფასებით, მიხეილ სააკაშვილი ცდილობს მსოფლიო დემოკრატიულ ლიდერებს მიბაძოს.
"სააკაშვილი ცდილობს დასავლელ, დემოკრატიულ ლიდერად ჩამოყალიბდეს. მისი ათასი სამშვენისით მოფენილი მუხის მაგიდის უკან, წიგნის თაროებზე ჯონ კენედის, მარგარეტ ტეტჩერის და ბილ კლინტონის ბიოგრაფიებია, იმ ადამიანებისა რომელთა მიბაძვაც აშკარად უნდა", წერს გამოცემის ჟურნალისტი დენიელ ჰამილტონი, რომელიც საქართველოს პრეზიდენტთან ინტერვიუსთვის თბილისს გასულ კვირას სტუმრობდა.
ამასთან, ჟურნალისტი აქცენტს საქართველოს მოდერნიზებაზე აკეთებს და აქვე განმარტავს, რომ სიტყვა "მოდერნიზაცია" მასთან საუბარში მიხეილ სააკაშვილმა "უამრავჯერ" თავად ახსენა.
"პრეზიდენტი სააკაშვილი სიტყვით მოდერნიზაცია "მოხიბლულია" და ჩვენი ერთსაათიანი საუბრის დროს ის უამრავჯერ გამოიყენა. "მოდერნიზაცია" სააკაშვილისთვის არ არის მხოლოდ ის სიტყვა, რომელსაც საჯარო სამსახურების გაუმჯობესებისა და ქვეყნის მოქალაქეებისთვის შესაძლებლობების ხელმისაწვდომობის დასახასიათებლად გამოიყენებ, არამედ ასევე იმ პოლიტიკის კოდია, რომლის მიზანიც იმის უზრუნველყოფაა, რომ საქართველო აღარასდროს იქცეს ისევ რუსეთის ფედერაციის სატელიტ ქვეყნად. საქართველოს ეკონომიკის მოდერნიზების პრეზიდენტისეული ჟინი მართვის ყველა სფეროზე გავრცელდა, დაწყებული სამხრეთ-აფრიკელი ბურების დაქირავებით, რათა მათ სასოფლო-სამეურნეო რეფორმებს გაუწიონ დახმარება და პროდუქტები გააუმჯობესონ და 2012 წელს იმ ახალი სარკინიგზო ხაზის გახსნით, რომელმაც საქართველოს მთავარი ქალაქები ევროპის საქალაქთაშორისო მარშრუტს უნდა დაუკავშიროს", - წერს დენილე ჰამილტონი.
აღნიშნული თემის მიმოხილვისას ის იმასაც განმარტავს, რომ საქართველოში ეკონომიკის დარგში უთამამესი რეფორმები უკვე ჩატარდა.
"პრეზიდენტი თავისუფალი ეკონომიკის მქადაგებელია. ის დაჯერებულად აცხადებს, რომ "ეკონომიკა არ შეიძლება იყოს ზედმეტად ღია" და "როგორც კი ჩაერევი ბიზნესში, ის ჩამოიშლება". რასაც ქადაგებს, იმას პრაქტიკაში ახორციელებს კიდეც", - ნათქვამია სტატიაში.
ჟურნალისტი ერთ-ერთი ყველაზე მნიშვნელოვან პრობლემად ენერგეტიკულ უსაფრთხოებას ასახელებს და იმას, რომ ამ კუთხით საქართველო რუსული საფრთხეებისთვის მიუწვდომელია, სწორედ მიხეილ სააკაშვილისა და ხელისუფლების წინდახედულობის შედეგად აფასებს.
"ერთ-ერთი ყველაზე მნიშვნელოვანი პრობლემა, რომლის წინაშეც ევროპა მომავალ ათწლეულებში აღმოჩნდება, ენერგეტიკული უსაფრთხოებაა, განსაკუთრებით თუ იმას გავითვალისწინებთ, რომ ბევრი ქვეყანა ენერგეტიკული მომარაგების საკითხში რუსეთზეა დამოკიდებული. იშვიათია ისეთი ზამთარი, როდესაც კრემლსა და ევროპის პატარა ქვეყნებს შორის ენერგეტიკასთან დაკავშირებით რაიმე დავა არ მოხდეს, სულ ბოლო მაგალითი ამისა 2009 წლის ნავთობის კრიზისია, როდესაც უნგრეთის, სლოვაკიისა და ჩეხეთის რესპუბლიკის ენერგომომარაგებას საფრთხე შეექმნა. ის რომ ამ თვალსაზრისით საქართველო რუსული საფრთხეებისთვის მიუწვდომელია, აღსანიშნავი წინდახედულობის შედეგია. ამ ბოლო წლებში მთავრობამ ინტენსიურად ჩადო ინვესტიციები განახლებად ენერგეტიკულ რესურსებში ისე, რომ ქვეყნის ელექტროენერგიის 85% ახლა ჰიდროელექტროსადგურებზე მოდის. უფრო აღსანიშნავია ის, რომ არსებული ჰიდროელექტროსადგურების სიმძლავრეები მოცემული მომენტისთვის მხოლოდ 20%-ითაა ამოქმედებული. ფაქტია რომ საქართველოს შეუძლია რუსეთს მიჰყიდოს ელექტროენერგია და იმისთვის, რომ სინათლე შეინარჩუნოს არ სჭირდება ყოველ ზამთარს კრემლთან დიპლომატიური მორჩილების დადასტურება, რაც სააკაშვილს რუსეთთან ურთიერთობაში ისეთ თვითდარწმუნებას ანიჭებს, როგორიც რეგიონის სხვა ლიდერებს არ გააჩნიათ", - წერს ის.
ამასთან, ბრიტანელი ჟურნალისტი სტატიაში რუსეთის აგრესიაზეც ამახვილებს ყურადღებას და აღნიშნავს, რომ მიუხედავად იმისა, რომ 2008 წლის აგვისტოს შემდეგ საქართველოს მიწაზე აღარ ისვრიან და აქ არც ყუმბარები დაცემულა, რუსეთის შემოჭრის შიში საქართველოსთვის მაინც ღრმა ჭრილობად რჩება.