"მიხეილ სააკაშვილმა თავისი ადგილი ისტორიაში უკვე დაიმკვიდრა", - ასეთია ბრიტანული გამოცემა "Conservativehome"-ის კორესპონდენტის დენიელ ჰამილტონის შეფასება, რომელიც საქართველოს პრეზიდენტთან ინტერვიუსთვის თბილისს გასულ კვირას სტუმრობდა.
"ვერავინ უარყოფს იმას, 2004 წლის არჩევნების შემდეგ სააკაშვილი ძლიერი პოლიტიკური ფიგურაა და დომინირებს საქართველოს პოლიტიკურ ლანდშაფტზე. საერთაშორისო არენაზე მისი მართლაც ბობოქარი აქტიურობა და ცეცხლოვანი რიტორიკა, ზოგიერთ მის მხარდამჭერს აფიქრებინებს, რომ შესაძლოა "მიშას" ხმაურიანი მმართველობა "საქართველოსთვის ზედმეტად დიდიც" იყოს. რამდენიმე ისეთი პერიფერიული პოლიტიკური ძალის გარდა, რომლებიც ღიად იცავს რუსოფილურ პოზიციას და ცდილობს გაამართლოს აფხაზეთისა და სამხრეთ-ოსეთის საქართველოსგან წაგლეჯვა, სააკაშვილს არავინ სდებს ბრალს დიქტატორულ ქმედებებში, სრულიადაც არა", - წერს ჟურნალისტი, რომლის სტატიის ქართულ ვერსიასაც "Foreignpress"-ი აქვეყნებს.
მისივე შეფასებით, სააკაშვილი - მისი ულევი, ევანგელისტური ენთუზიაზმით საკუთარი საქმისადმი იოლად ვერ ჯდება კონსტიტუციურ ნორმებში, რომელთა თანახმადაც მას ეკრძალება 2013 წელს თანამდებობაზე მესამედ მოსვლა.
"ზოგიერთი სპეკულირებს, რომ სააკაშვილი შეეცდება პოლიტიკაში დარჩენას პრემიერ-მინისტრის ახლად განმტკიცებული პოსტის დაკავებით. პრეზიდენტი, რომელიც სხვა არაფერია თუ არა სრულყოფილი პოლიტიკოსი, უარს ამბობს მისი განზრახვების დადასტურებაზე, არ უნდა რომ წარუმატებლობის იმავე სინდრომით დაავადდეს, რომელმაც ტონი ბლერის ბოლო წლებს ოფისში დამბლა დასცა. რაც არ უნდა გადაწყვიტოს მან და ქართველმა ხალხმა, მიხეილ სააკაშვილმა თავისი ადგილი ისტორიაში უკვე დაიმკვიდრა", - მიიჩნევს ბრიტანული გამოცემის კორესპონდენტი.
ამასთან, ჟურნალისტი სტატიაში იმასაც აცხადებს, რომ სწორედ მიხეილ სააკაშვილის ის ადამიანი, რომელმაც საქართველო მსოფლიო ყურადღების ცენტრში მოაქცია.
"გიყვარს თუ გძულს სააკაშვილი, მან თავისი ქვეყანა კავკასიის პატარა, უცნობი სახელმწიფოდან ისეთად აქცია, რომელიც მსოფლიოს ყველაზე ძლევამოსილი ლიდერების ყურადღებას იპყრობს(და ხანდახან აღფრთოვანებასაც). პრეზიდენტის ოფისი ამის დამადასტურებელი საბუთია - მის კედლებზე უამრავი ლიდერის სურათია გამოფენილი - ჯორჯ ბუში, ნიკოლა სარკოზი, მისი უდიდებულესობა დედოფალი და ბარაქ ობამა. აქ მართლაც მხოლოდ მსოფლიოს ერთი ლიდერის სურათს ვერ ნახავთ და ეს ვლადიმერ პუტინია", - აცხადებს დენიელ ჰამილტონი, რომელსაც ამ უკანასკნელი დეტალის შემჩნევა არ გასჭირვებია.
