სასჯელაღსრულების, პრობაციისა და იურიდიულ დახმარების საკითხთა მინისტრი ხათუნა კალმახელიძე საპარლამენტო ოპოზიციას საზოგადოების შეცდომაში შეყვანისგან თავის შეკავებას ურჩევს.
ამის შესახებ კალმახელიძემ დღეს ადამიანის უფლებათა და იურიდიულ საკითხთა კომიტეტების გაერთიანებულ სხდომაზე ოპოზიციონერი პარლამენტარის გია ცაგარეიშვილის მისამართით აღნიშნა.
დეპუტატმა მინისტრისგან მოითხოვა ინფორმაცია მიეწოდებინა ციხეებში წამების ფაქტებზე, ასევე ქსნის სასჯელაღრულებაში არსებული გაუსაძლის პირობების, პატიმართა სიკვდილიანობისა და დაკავებულთა რაოდენობის შესახებ.
აღნიშნულთან დაკავშირებით, კალმახელიძემ გია ცაგარეიშვილის მოუწოდა, რომ სანამ რაიმე ინფორმაციას გაახმოვანებს სამინისტროში გადამოწმოს, რადგან წამების შესახებ ანგარიში, რომელზეც დეპუტატი საუბრობს 2009 წლის ფაქტებს ასახავს და არა 2010 წლის, რომლის შესახებაც ანგარიში მიმდინარე წელს გამოქვეყნდება.
ამასთან, სასჯელაღრულების მინისტრმა ოპოზიციონერ დეპუტატს განუმარტა, რომ ქსნის ძველი დაწესებულება უკვე აღარ არსებობს და მის მაგივრად ევროსტანდარტების ახალი საპატიმროა აშენებული.
"ხშირად ისეთი რაღაც მესმის, რომ მიკვირს სადამდე შეიძლება წავიდეს ადამიანის ფანტაზია. კარგი იქნება თუ ჯერ ინფორმაცია გადამოწმებთ და შემდეგ ისე გაკეთებთ განცხადებას, რათა თავიდან ავიცილოთ პოპულისტური გამოსვლებით საზოგადოების შეცდომაში შეყვანა", - აღნიშნა მინისტრმა.
