ამერიკელი სენატორები რუსეთის მიერ საქართველოს ოკუპაციის საკითხზე რეზოლუციის მისაღებად მზად არიან.
ამის შესახებ აშშ-ში ვიზიტითYმყოფმა საქართველოს პრემიერ-მინისტრმა ნიკა გილაურმა ჟურნალისტებს სენატორებთან შეხვედრის შემდეგ განუცხადა.
"სენატორებთან განსახილველი ერთ-ერთი საკითხი რუსეთის მიერ საქართველოს ოკუპაციის შესახებ ის რეზოლუცია იყო, რომელიც განსახილველად სენატში შედის. ჩვენ დიდი სურვილი გვაქვს, რომ ამ რეზოლუციას მხარი მთელმა სენატმა დაუჭიროს. იმათი მხრიდან, ვისაც ჩვენ ვესაუბრებით, რეზოლუციისადმი მხარდაჭერა მართლაც არსებობს", - განმარტა ნიკა გილაურმა.
აღსანიშნავია, რომ ჯონ მაკკეინისა და სხვა სენატორებთან შეხვედრის გარდა საქართველოს პრემიერი "ათასწლეულის განვითარების კორპორაციის" ხელმძღვანელსაც შეხვდა და მასთან ახალი გრანტის გამოყოფის თემა განიხილა.
გარდა ამისა, ნიკა გილაური ამერიკის პროგრესის ცენტრში გამართულ მრგვალ მაგიდასაც დაესწრო.
საქართველოს მთავრობის ხელმძღვანელი შეერთებულ შტატებში ვიზიტს განაგრძობს. მას დღეს მორიგი აუდიენცია ფინანსთა მინისტრთან აქვს დაგეგმილი.
შეხვედრებზე განსახილველი საკითხებია ორმხივი ეკონომიკური ურთიერთობა და აშშ-საქართველოს შორის თავისუფალი ვაჭრობის პოტენციური შესაძლებლობა. ნიკა გილაური აშშ-ში 1-ელ თებერვალს გაემგზავრა.