საჭიროა ნამდვილი, ხანგრძლივი მშვიდობა და არა კიდევ ერთი პაუზა რუსეთის შემოჭრებს შორის, - ამის შესახებ უკრაინის პრეზიდენტი ვოლოდიმირ ზელენსკი X-ზე გავრცელებულ განცხადებაში წერს.
„დღეს, პრეზიდენტ ტრამპთან საუბრის შემდეგ, ევროპელ ლიდერებთან ერთად კიდევ ერთხელ შევთანხმდით პოზიციებზე. პოზიციები ნათელია.
საჭიროა ნამდვილი, ხანგრძლივი მშვიდობა და არა უბრალოდ კიდევ ერთი პაუზა რუსეთის შემოჭრებს შორის.
მკვლელობები რაც შეიძლება მალე უნდა შეწყდეს, ცეცხლი უნდა შეწყდეს როგორც ბრძოლის ველზე, ასევე ცაში, ასევე ჩვენს საპორტო ინფრასტრუქტურაზე.
ყველა უკრაინელი სამხედრო ტყვე და მშვიდობიანი მოქალაქე უნდა გათავისუფლდეს, ხოლო რუსეთის მიერ გატაცებული ბავშვები უნდა დაბრუნდნენ.
ჩვენი ათასობით მოქალაქე ტყვეობაში რჩება - ისინი ყველანი სახლში უნდა დაბრუნდნენ. რუსეთზე ზეწოლა უნდა გაგრძელდეს მანამდე, ვიდრე აგრესია და ოკუპაცია გრძელდება“, - წერს ზელენსკი.
მისი თქმით, ტრამპს სანქციების გამკაცრების აუცილებლობაზე ესაუბრა.
„პრეზიდენტ ტრამპთან საუბრისას მე ვისაუბრე სანქციების გამკაცრების აუცილებლობაზე იმ შემთხვევაში, თუ სამმხრივი შეხვედრა არ გაიმართება ან რუსეთი ომის სამართლიანი დასრულების თავიდან აცილებას შეეცდება.
სანქციები ეფექტური ინსტრუმენტია. უსაფრთხოება უნდა იყოს გარანტირებული საიმედო და გრძელვადიან პერსპექტივაში, როგორც ევროპის, ასევე შეერთებული შტატების მონაწილეობით.
უკრაინისთვის მნიშვნელოვანი ყველა საკითხი უკრაინის მონაწილეობით უნდა განიხილებოდეს და არც ერთი საკითხი, განსაკუთრებით ტერიტორიული, უკრაინის მონაწილეობის გარეშე ვერ გადაწყდება.
მადლობას ვუხდი ჩვენს პარტნიორებს, რომლებიც გვეხმარებიან. დღეს ევროპელმა ლიდერებმა მნიშვნელოვანი განცხადება გააკეთეს, რომელიც ჩვენს პოზიციას აძლიერებს.
ჩვენ ვაგრძელებთ ერთად მუშაობას - ევროპელები, ამერიკელები და მსოფლიოში ყველა, ვინც საერთაშორისო ურთიერთობებში მშვიდობისა და სტაბილურობისკენ ისწრაფვის“, - წერს ზელენსკი.
