"დემოკრატიული მოძრაობა - ერთიანი საქართველოს" თავმჯდომარე ნინო ბურჯანაძე დავოსიდან დაბრუნდა.
პარტიის პრესსამსახურის ინფორმაციით, ბურჯანაძემ დავოსის მსოფლიო ეკონომიკური ფორუმის ფარგლებში დაგეგმილ ღონისძიებებში მიიღო მონაწილეობა, სადაც მსოფლიო მნიშვნელობის აქტუალურ საკითხებზე მიმდინარეობდა მსჯელობა, განიხილებოდა უსაფრთხოებისა და ეკონომიკური გამოწვევების საკითხები, რომლებიც ყველა ქვეყნისთვის ძალიან მნიშვნელოვანია.
ვიზიტის ფარგლებში ორმხრივი შეხვედრები შედგა, როგორც პოლიტიკურ ლიდერებთან, ასევე საერთაშორისო საზოგადოების წარმომადგენლებთან, რომლებიც უმაღლესი დონის გადაწყვეტილებების მიღების პროცესში უმნიშვნელოვანეს როლს ასრულებენ.
აღნიშნულ შეხვედრებზე დიდი ინტერესით განიხილებოდა საქართველოში მიმდინარე პროცესები და ამ პროცესებთან დაკავშირებით ბურჯანაძის შეფასებები და ანალიზი.
"არაფორმალური შეხვედრების დროს ნათლად გამოჩნდა, რომ იმ ეკონომიკური გამოწვევების ფონზე, რომელიც მთელ მსოფლიოს და მათ შორის საქართველოს ელოდება, სავალალოა საქართველოს ხელისუფლების არაპროფესიონალური და არათანმიმდევრული ეკონომიკური პოლიტიკა. ასევე ნათელი იყო, რომ ილუზიები საქართველოს განვითარებასთან დაკავშირებით თითქმის აღარ არსებობს. მიუხედავად იმისა, რომ ხელისუფლება განუზომლად დიდ თანხას ხარჯავს, რათა საკუთარი თავი და მსოფლიოს თვალში ნათელ ფერებში წარმოაჩინოს, მათი პროგნოზები, ვინც რეალურად დაინტერესებულია ჩვენს ქვეყანაში მიმდინარე პროცესებით, ნამდვილად არასახარბიელოა", - აცხადებს სამშობლოში დაბრუნებული ბურჯანაძე.
მისი განმარტებით, აღნიშნულის გამო, მსგავსი ტიპის შეხვედრებს განსაკუთრებული დატვირთვა აქვთ, რათა საერთაშორისო თანამეგობრობას ჰქონდეს ობიექტური ინფორმაცია ჩვენს ქვეყანაში მიმდინარე პროცესებთან და არსებულ საფრთხეებთან დაკავშირებით.
"შეხვედრებისას კიდევ ერთხელ ნათლად გამოჩნდა, რომ თუ საქართველოს სახელმწიფო პოლიტიკაში ცვლილებები არ განხორციელდა, ქვეყანა ინერციით განაგრძობს სვლას, მას არანაირი შანსი დაიცვას საკუთარი ინტერესები და ადგილი დაიბრუნოს რეგიონში აღარ ექნება. ხოლო იმას, რომ ამ ხელისუფლების პირობებში არათუ მოგვარდება აფხაზეთისა და სამაჩაბლოს პრობლემა, არამედ მათ კიდევ უფრო დავშორდებით, პირად საუბრებში, პრაქტიკულად, ყველა აღიარებს", - განმარტავს "დემოკრატიული საქართველოს" ლიდერი.
აღსანიშნავია, რომ დავოსში ვიზიტის დროს "დემოკრატიული მოძრაობის" ლიდერთან ამ ეტაპისთვის უკვე რამდენიმე ქვეყანაში მნიშვნელოვანი შეხვედრები დაიგეგმა.
ბურჯანაძე შვეიცარიას 26-29 იანვარს სტუმრობდა.
