„დემოკრატიული მოძრაობა - ერთიანი საქართველოს" თავმჯდომარე ნინო ბურჯანაძე ვიზიტით დავოსში იმყოფებოდა.
ნინო ბურჯანაძემ დავოსის მსოფლიო ეკონომიკური ფორუმის ფარგლებში დაგეგმილ ღონისძიებებში მიიღო მონაწილეობა, სადაც მსოფლიო მნიშვნელობის აქტუალურ საკითხებზე მიმდინარეობდა მსჯელობა, განიხილებოდა უსაფრთხოებისა და ეკონომიკური გამოწვევების საკითხები, რომლებიც ყველა ქვეყნისთვის ძალიან მნიშვნელოვანია.
ვიზიტის ფარგლებში ორმხრივი შეხვედრები შედგა, როგორც პოლიტიკურ ლიდერებთან, ასევე, საერთაშორისო საზოგადოების წარმომადგენლებთან, რომლებიც უმაღლესი დონის გადაწყვეტილებების მიღების პროცესში უმნიშვნელოვანეს როლს ასრულებენ.
აღნიშნულ შეხვედრებზე დიდი ინტერესით განიხილებოდა საქართველოში მიმდინარე პროცესები და ამ პროცესებთან დაკავშირებით ნინო ბურჯანაძის შეფასებები და ანალიზი.
„არაფორმალურ შეხვედრების დროს ნათლად გამოჩნდა, რომ იმ ეკონომიკური გამოწვევების ფონზე, რომელიც მთელს მსოფლიოს და მათ შორის საქართველოს ელოდება, სავალალოა საქართველოს ხელისუფლების არაპროფესიონალური და არათანმიმდევრული ეკონომიკური პოლიტიკა.
ასევე ნათელი იყო, რომ ილუზიები საქართველოს განვითარებასთან დაკავშირებით თითქმის აღარ არსებობს. მიუხედავად იმისა, რომ ხელისუფლება განუზომლად დიდ თანხებს ხარჯავს, რათა საკუთარი თავი და მისი პოლიტიკა მსოფლიოს თვალში ნათელ ფერებში წარმოაჩინოს, მათი პროგნოზები, ვინც რეალურად დაინტერესებულია ჩვენს ქვეყანაში მიმდინარე პროცესებით, ნამდვილად არასახარბიელოა.
სწორედ ამიტომ მსგავსი ტიპის შეხვედრებს განსაკუთრებული დატვირთვა აქვთ, რათა საერთაშორისო თანამეგობრობას ჰქონდეს ობიექტური ინფორმაცია ჩვენს ქვეყანაში მიმდინარე პროცესებთან და არსებულ საფრთხეებთან დაკავშირებით.
შეხვედრებისას კიდევ ერთხელ ნათელად გამოჩნდა, რომ თუ საქართველოს სახელმწიფო პოლიტიკაში ცვლილებები არ განხორციელდა, ქვეყანა ინერციით განაგრძობს სვლას, მას არანაირი შანსი დაიცვას საკუთარი ინტერესები და ადგილი დაიბრუნოს რეგიონში აღარ ექნება.
ხოლო იმას, რომ ამ ხელისუფლების პირობებში არა თუ მოგვარდება აფხაზეთისა და სამაჩაბლოს პრობლემა, არამედ მათ კიდევ უფრო დავშორდებით პირად საუბრებში, პრაქტიკულად, ყველა აღიარებს", - აცხადებს დავოსიდან დაბრუნებული ნინო ბურჯანაძე.
დავოსში ვიზიტის დროს „დემოკრატიული მოძრაობის" ლიდერთან ამ ეტაპისთვის უკვე რამდენიმე ქვეყანაში მნიშვნელოვანი შეხვედრები დაიგეგმა.