ადამიანის უფლებათა დაცვის ევროპული სასამართლო რუსეთის წინააღმდეგ საქართველოს სარჩელთან დაკავშირებით ევროსაბჭოს საპარლამენტო ასამბლეის მონიტორინგის კომიტეტის მომხსენებელ მათიას იორშსა და საქართველოს სახალხო დამცველ გიორგი ტუღუშსაც დაკითხავს.
სტრასბურგში მყოფი ქართული დელეგაციის წევრების განცხადებით, მათი დაკითხვა თავად სასამართლომ ჩათვალა მიზანშეწონილად.
რაც შეეხება სასამართლოში დღეს მიმდინარე პროცესს, ის რამდენიმე საათის წინ, კვლავ ქართველი მოწმეების დაკითხვით განახლდა. რუსეთიდან 2006 წელს დეპორტირებული რამდენიმე მოქალაქის გარდა, დღესვე დაიკითხება იმ პერიოდში, რუსეთში საქართველოს კონსული ზურაბ პატარიძეც.
აღსანიშნავია, რიმ უკვე ხვალიდან, 2 თებერვლიდან სასამართლო რუსეთის მხარის მოწმეების დაკითხვას დაიწყებს. მოსკოვს 10 მოწმე ჰყავს წარდგენილი, მათ შორის რამდენიმე მილიციის და მიგრაციის სამსახურის თანამშრომელია.
შეგახსენებთ, რომ სტრასბურგის სასამართლოში საქართველოს სარჩელის განხილვა მიმდინარეობს. საქმე ეხება 2006 წელს რუსეთიდან ქართველების მასობრივ დეპორტაციას, რაც თბილისის შეფასებით, ეთნიკურ ნიადაგზე მოხდა.
სასამართლომ გუშინ მოწმის სახით რამდენიმე დაზარალებული ქართველი დაკითხა. მოწმეების დაკითხვა დღესაც გაგრძელდება.