ბელორუსი ევროკავშირს საპასუხო სანქციით ემუქრება.
ბელორუსის საგარეო საქმეთა სამინისტროს ოფიციალური წარმომადგენლის ანდრეი სავინიხის განცხადებით, საპასუხო სანქციაზე ქვეყნის მთავრობა უკვე მუშაობს.
სავინიხი არ გამორიცხავს, რომ ევროკავშირის მიმართ მინსკის "პასუხი" მის მიერ ბელორუსის ხელისუფლების წარმომადგენლების წინააღმდეგ დაწესებული სანქციის ანალოგიური იყოს, რის შესაბამისადაც, ორგანიზაციის ოფიციალურ პირებს ქვეყანაში ჩასვლა აეკრძალებათ.
"ევროკავშირთან ურთიერთობების დაძაბვა ჩვენი არჩევანი არ ყოფილა, მაგრამ ეს გადაწყვეტილება გვაიძულებს მივიღოთ პროპორციული ზომები, რომელიც გააძლიერებს ქვეყნის სუვერენიტეტს და ბელორუსის საზოგადოების ერთიანობასა და კონსოლიდაციას. ბელორუსის მთავრობაში უკვე განიხილავენ საპასუხო სანქციების დაწესებას ევროკავშირის ოფიციალური პირების მიმართ", - განაცხადა ბელორუსის საგარეო უწყების ხელმძღვანელმა სპეციალურ პრესკონფერენციაზე.
შეგახსენებთ, რომ ევროკავშირმა და ამერიკის შეერთებულმა შტატებმა ბელორუსის მთავრობის მიმართ სანქციები მიიღო, რის მიხედვითაც, ბელორუსის მთავრობის წევრებს შეერთებულ შტატებში ჩასვლა ეკრძალათ. მათ ასევე დაუწესდათ ფინანსური სანქციები.
გარდა ამისა, ბელორუსის ოფიციალურ პირებს არც ევროკავშირის ქვეყნების ტერიტორიაზე შეეძლებათ პირადი ანგარიშის გახსნა და ყველა მათგანი დღეიდან ავტომატურად იბლოკება. სანქცია პრეზიდენტ ალექსანდრე ლუკაშენკოსა და მის 160 თანაგუნდელს ეხება.