დღეს ფრაქცია "ქრისტიან-დემოკრატების" მდივანი ზაზა გაბუნია რუსთაველის გამზირზე დაგეგმილ სარემონტო სამუშაოებს გამოეხმაურა და "ზარია-ვოსტოკას" შენობისთვის კულტურული მემკვიდრეობის ძეგლის სტატუსის მოხსნა გააპროტესტა.
მისი თქმით, რუსთაველის #42-ში განთავსებული ყოფილი "ზარია ვოსტოკას" შენობა 2007 წლიდან კულტურული მემკვიდრეობის ნუსხიდან ამოიღეს, რამაც ინვესტორებს იქ ბიზნესსაქმიანობის დაწყების საშუალება მისცა. მეტიც, ძეგლი არ ინგრეოდა, ამ დროს კი ამ სამუზეუმო ექსპონატს შუშის მიშენება გაუკეთეს.
გაბუნიას თქმით, კომპანია "კაზმა" ხელისუფლების ექსკლუზიური უფლებით სარგებლობს და საინვესტიციო საქმიანობას ახორციელებს.
"დაწყებული სამუშაოების გამო ექსპერტები შენობის ავთენტურობის საფრთხეზე საუბრობენ. გვერდითა ფასადის დანგრევით უკვე დაიკარგა ერთი თაღი",_აცხადებს გაბუნია.
"ქრისტიან-დემოკრატების" მდივანს რამდენიმე საკითხის გარკვევა აინტერესებს.
კერძოდ, იგი ითხოვს, კომპანიამ "კაზმა" არქიტექორებისა და დაინტერესებული საზოგადოებისთვის ახსნა-განმარტება გააკეთოს და ისინი დაარწმუნოს, რომ სამუშაოები საფრთხის შემცველი არ არის. ამასთან, მერიამ ერთპიროვნული გადაწყვეტილება არ მიიღოს და თბილისის საკრებულო საქმის კურსში ჩააყენოს. ზაზა გაბუნიას მესამე მოთხოვნა კი უკავშირდება ძეგლთა დაცვის შესახებ კანონში შესატან ცვლილებას, რომლითაც გაჩნდება იმის გარანტია, რომ ისტორიული და ეროვნული მნიშვნელობის ძეგლს პირადი ახირების გამო ვერავინ შეეხება.
ამასთან, გაბუნია აღნიშნავს, რომ კომპანია "კაზმა" ოფიციალურად ქართულ-ბრიტანულად მოიხსენიება, თუმცა ამის დამადასტურებელ კვალს "ქრისტიან-დემოკრატებმა" ვერსად მიაგნეს.
