საქართველოს პრეზიდენტი მიხეილ სააკაშვილი გერმანიის კანცლერს, ანგელა მერკელს შეხვდება.
როგორც პრეზიდენტის პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე განაცხადა, სააკაშვილი-მერკელის შეხვედრა მიუნხენის უსაფრთხოების ყოველწლიური კონფერენციის ფარგლებში გაიმართება.
გარდა ამისა, დაზუსტებული ინფორმაციით, მიხეილ სააკაშვილი შვეიცარიის პრეზიდენტთანაც გამართავს შეხვედრას.
"ზუსტდება სხვა ორმხრივი შეხვედრების ნუსხაც", - განმარტა მანჯგალაძემ.
ამასთან, მისივე თქმით, მიუნხენის ყოველწლიურ კონფერენციაზე მიხეილ სააკაშვილი სიტყვითაც გამოვა.
შეგახსენებთ, რომ მიუნხენში უსაფრთხოების 46-ე კონფერენცია 4 თებერვალს გაიხსნება და 6 თებერვლამდე გასტანს. მას 350-ზე მეტი მაღალი დონის სტუმარი, მათ შორის საქართველოს პრეზიდენტი დაესწრება.
კონფერენციაზე განსახილველი საკითხებია: ახალი გამოწვევები, საერთაშორისო უსაფრთხოების პოლიტიკა, მსოფლიო ფინანსური კრიზისი, კიბერ ომი, განიარაღება და ბირთვული იარაღის გაუვრცელებლობა.