საქართველოს პრეზიდენტი მიხეილ სააკაშვილი მიმდინარე თვეს პარლამენტის წინაშე წლიური ანგარიშით გამოვა.
ამის შესახებ პრეზიდენტის პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე განაცხადა.
"პრეზიდენტის კანონმდებლების წინაშე გამოსვლის ზუსტი დრო დაზუსტებული ჯერჯერობით არ არის, მაგრამ სავარაუდოდ ეს თებერვალში მოხდება" , - განმარტა მანჯგალაძემ.
მისივე თქმით, ამ ეტაპზე პრეზიდენტის მოხსენების შინაარსობრივ ნაწილზე მიმდინარეობს მუშაობა.
"ეს იქნება ანგარიში ხალხის წინაშე - რა გაკეთდა, რა გეგმები პერსპექტივები და გამოწვევები არსებობს ქვეყნის წინაშე, რა ხედვები აქვს ქვეყნის პირველ პირს, როგორც სოციალურ და ეკონომიკურ, ისე საერთაშორისო და უსაფრთხოების საკითხებზე", - აღნიშნა პრეზიდენტის პრესსპიკერმა.
მისივე განმარტებით, პრეზიდენტის პარლამენტში გამოსვლა ქვეყნის პირველ პირსა და საკანონმდებლო ორგანოს სპიკერს დავით ბაქრაძეს შორის გამართული კონსულტაციების შემდეგ გადაწყდა.
