თბილისის მერიის მიერ საქალაქო რეგულარული სამგზავრო გადაყვანის ნებართვის მაძიებელთათვის გამოცხადებული კონკურსის შედეგი დღეს გახდა ცნობილი. 5 ლოტზე გამარჯვებული 4 კომპანია გამოვლინდა, ესენია: შპს"თბილ ლაინი", შპს "კაპიტალ გრუპი", შპს "თბილ ქარი" და შპს "ფაბლიქ ქარი".
საკონკურსო განაცხადში აღნიშნულმა კომპანიებმა თანამედროვე სტანდარტის, 2011 წელს წარმოებული მანქანები წარადგინეს. ამასთან, მიკროავტობუსში ელექტრონული გადახდის აპარატი დამონტაჟდება, რადგან დაგეგმილია სამარშრუტო ტაქსების გადახდის ერთიან საბარათე სისტემაში გაერთიანება.
ახალი მიკროავტობუსით მგზავრობისას თბილისში მცხოვრები სოციალურად დაუცველი პირები ყველა იმ შეღავათით ისარგებლებენ, რომლითაც დღეს საზოგადოებრივი ტრანსპორტით გადაადგილებისას სარგებლობენ.
გამარჯვებული კომპანიები ვალდებულებას იღებენ, რომ პირველ ეტაპზე ამ სფეროში მომუშავე ყველა მძღოლი დაასაქმონ. აღნიშნული პირობა კონკურსანტებს თბილისის მერიამ საკონკურსო განაცხადში დაუწეს.
ტრანსპორტის პროფესიული კავშირის თავმჯდომარემ კონკურსში გამარჯვებულ კომპანიებთან თანამშრომლობის სურვილი გამოთქვა. სავარაუდოდ, მომავალში მათთან შესაბამისი მემორანდუმიც გაფორმდება.
შეგახსენებთ, თბილისის მერიამ ქალაქის ადმინისტრაციულ საზღვრებში ადგილობრივი საქალაქო რეგულარული სამგზავრო გადაყვანის ნებართვის მაძიებელთა კონკურსი 2010 წლის 6 დეკემბერს გამოაცხადა, რაც თბილისელებისთვის კომფორტული, უსაფრთხო და უკეთესი სატრანსპორტო მომსახურების შეთავაზებით ახსნა.
კონკურსში მონაწილეობის მსურველებს საბუთების წარსადგენად 40-დღიანი ვადა დაუწესდათ, რომელიც 14 იანვარს ამოიწურა.
