საანგარიშო პერიოდში საქართველოს ტერიტორიასა და მის ფარგლებს გარეთ მოქმედ პირთა გარკვეული ჯგუფი სხვადასხვა საბაბით – მათ შორის იყო „უცხოური გავლენის გამჭვირვალობის შესახებ კანონის“ მიღება, საპარლამენტო არჩევნების „გაყალბება“ – საქართველოში გეგმავდა სამოქალაქო არეულობის და დესტაბილიზაციის პროვოცირებას, რომლის საბოლოო მიზანი ხელისუფლების ძალადობრივი გზით შეცვლა იყო, – ამის შესახებ სახელმწიფო უსაფრთხოების სამსახურის უფროსმა, ანრი ოხანაშვილმა განაცხადა პარლამენტში, სადაც ის დეპუტატებს 2024 წლის საქმიანობის ანგარიშს აცნობს.
ოხანაშვილის თქმით, დანაშაულებრივ გეგმებში სხვადასხვა პერიოდში აქტიურად მონაწილეობდნენ ქვეყნის ფარგლების გარეთ მყოფი საქართველოს მოქალაქეები.
„კერძოდ, უკრაინაში მებრძოლი ქართველების კონკრეტული ნაწილი, რომელიც აცხადებდა მზადყოფნას, ჩამოსულიყო საქართველოში და აქტიური მონაწილეობა მიეღო პოლიციის წინააღმდეგ დაგეგმილ ძალადობაში, რასაც ვითარების უკიდურესი დაძაბვა უნდა მოჰყოლოდა. ამასთანავე, განიხილებოდა მმართველი ძალის თანამდებობის პირების ლიკვიდაციის გეგმები“, – განაცხადა ანრი ოხანაშვილმა.
ამასთან, როგორც ოხანაშვილმა აღნიშნა, საპროტესტო გამოსვლების ორგანიზატორების მიზანს მიმდინარე პროცესების ე.წ. მაიდანიზაცია წარმოადგენდა.
„იგეგმებოდა თბილისის სატრანსპორტო კვანძების პარალიზება, სამთავრობო დაწესებულებებსა და სტრატეგიული დანიშნულების ობიექტებთან მისასვლელი გზების, სამართალდამცავი ორგანოების დისლოკაციის ბაზების ბლოკირება, ცენტრალურ გამზირებზე ე.წ. კარვების ქალაქების მოწყობა. საპროტესტო გამოსვლების ორგანიზატორების მიერ ასევე იგეგმებოდა 2024 წლის 14 დეკემბერს საქართველოს პრეზიდენტის არჩევნების პროცესის ჩაშლა. ამ მიზნით განიხილებოდა საქართველოს პარლამენტის მიმდებარე ტერიტორიაზე სიტუაციის მაქსიმალურად დაძაბვა, რასაც უნდა მოჰყოლოდა მსხვერპლი და მასზე პასუხისმგებლობა დაკისრებოდა ხელისუფლებას“, – განაცხადა ანრი ოხანაშვილმა.
ანრი ოხანაშვილის შეფასებით, სამსახურის მიერ გატარებული შესაბამისი ოპერატიული და პრევენციული ღონისძიებების შედეგად, მათ შორის არსებულ საფრთხეებზე საზოგადოების დროული ინფორმირების გზით, მოხერხდა დესტრუქციული პროცესების თავიდან აცილება და სტაბილური გარემოს შენარჩუნება.
სუს-ის ანგარიშის თანახმად, 2024 წელს ე.წ. რბილი ძალის პოლიტიკის ფარგლებში, აქტიურად მიმდინარეობდა მუშაობა ეთნიკური და რელიგიური უმცირესობებით დასახლებულ რეგიონებში პოზიციების გასამყარებლად. გამოიკვეთა ცალკეული უცხო ქვეყნის სპეციალურ სამსახურთან დაკავშირებული გარკვეული ჯგუფების გააქტიურება სეპარატისტული და ნაციონალისტური იდეოლოგიის გავრცელებისა და შესაბამისი განწყობების შექმნის მიზნით.
ანგარიშის მიხედვით, 2024 წელს საქართველოში უცხო ქვეყნის სპეცსამსახურები საკუთარი ქვეყნების ინტერესების გასატარებლად აქტიურად ცდილობდნენ სხვადასხვა პოლიტიკურ ძალასა და მათ ლიდერებთან კავშირის დამყარებას.
„სამსახურის მიერ ამ მიმართულებით უწყვეტ რეჟიმში მიმდინარეობდა პროცესების მონიტორინგი და ოპერატიული ვითარების კონტროლი. გრძელდებოდა უცხო ქვეყნების სპეციალურ სამსახურებთან კავშირში მყოფი პოლიტიკური და რელიგიური პირების, ნაციონალისტური და სეპარატისტული განწყობების გაღვივებაში მონაწილე ძალების გამოვლენა. ქვეყნის ინტერესებისთვის არასასურველი პროცესების თავიდან აცილებისა და აღკვეთის მიზნით ტარდებოდა სათანადო ღონისძიებები. მსურს, ყურადღება გავამახვილო იმ საგანგაშო გარემოებაზე, რომ 2024 წელს უცხო ძალების ერთ-ერთ პრიორიტეტულ ამოცანად საქართველოს ახალგაზრდულ სეგმენტზე მუშაობის გააქტიურება იქცა. მათი მიზანი უცხო ქვეყნებისადმი ლოიალურად განწყობილი და მათ ეროვნულ/საზოგადოებრივ ღირებულებებთან ახლოს მდგომი ახალი თაობის ფორმირების მცდელობა იყო“, – განაცხადა ანრი ოხანაშვილმა პარლამენტში.
ანრი ოხანაშვილის თქმით, საქართველოს ახალგაზრდულ სეგმენტზე უცხო ქვეყნების სპეციალური სამსახურების და სახელმწიფო თუ არასამთავრობო ორგანიზაციების დესტრუქციული მუშაობის აღკვეთა/პრევენციის მიზნით ინტენსიური ღონისძიებები ტარდებოდა.
„2024 წელს სახელმწიფო უსაფრთხოების სამსახური, კონტრდაზვერვითი საქმიანობის ფარგლებში, განაგრძობდა მუშაობას საქართველოში უცხო ქვეყნების სპეციალური სამსახურის დაინტერესების სფეროების და მისწრაფებების, მათი საქმიანობის მეთოდებისა და ფორმების გამოვლენის მიმართულებით. უსაფრთხოების თვალსაზრისით 2024 წელი, გასული წლის მსგავსად, სტაბილურობის წინააღმდეგ მიმართული პროცესებითა და მკვეთრად გაზრდილი საფრთხეებით იყო დატვირთული. რეგიონში შექმნილი ვითარების ფონზე, მომეტებული საფრთხეების გათვალისწინებით, სახელმწიფო უსაფრთხოების სამსახური უწყვეტ რეჟიმში ახდენდა ქვეყნის ტერიტორიაზე ოპერატიული ვითარების კონტროლს. უცხო ქვეყნების სპეციალური სამსახურების მიერ განსაკუთრებული ყურადღება ეთმობოდა საქართველოს საშინაო და საგარეო პოლიტიკურ პროცესებზე, ასევე ქვეყანაზე ეკონომიკური ზეგავლენის ბერკეტების მოპოვებას. სამსახურის ოპერატიული, ოპერატიულ-საგამოძიებო და ანალიტიკური მუშაობის შედეგად, მათ შორის სხვა სახელმწიფო ორგანოებთან კოორდინაციის პირობებში, მოხერხდა უცხო ქვეყნების სპეცსამსახურების მიერ ინსპირირებული ქვეყნის ეროვნული ინტერესების დამაზიანებელი ღონისძიებების განეიტრალება“, – განაცხადა ანრი ოხანაშვილმა.
ანგარიშის თანახმად, 2024 წელს სახელმწიფო უსაფრთხოების სამსახურის კონტრდაზვერვითი საქმიანობის შედეგად კონტრდაზვერვის დეპარტამენტის მიერ გამოძიება სისხლის სამართლის რვა საქმეზე დაიწყო.
