"ახალი მემარჯვენეები" საქართველოს მთავრობას ქვეყანაში ინფლაციის დაძლევის კონკრეტულ წინადადებებს სთავაზობენ.
როგორც პარტიის ლიდერმა დავით გამყრელიძემ ეკონომიკის ექსპერტებისა და ანალიტიკოსების დღეს გამართულ შეხვედრაზე განაცხადა, "გვქონდა მოლოდინი რომ მთავრობა საზოგადოებას შესთავაზებდა გარკვეულ წინადადებებს ინფლაციის დაძლევასთან დაკავშირებით. შეიძლება ამ წინადადებებს არ ჰქონოდა სიზუსტის პრეტენზია, მაგრამ ეს არის პრობლემები, რომლებიც სწრაფად გადაჭრას მოითხოვს. ეს ყველაფერი ხელისუფლებასთან დიალოგით თუ ხელისუფლების ინიციატივით უნდა მოხდეს."
"ჩვენ საჭიროდ მიგვაჩნია ბიუჯეტის დეფიციტის შემცირების მიზნით მთავრობამ დაუყონებლივ დააბრუნოს პარლამენტში ხელახალი განხილვისთვის, 2011 წლის საქართველოს ბიუჯეტი მნიშვნელოვნად შემცირებული ხარჯვითი ნაწილით. ასევე, ბიუჯეტის ხარჯვითი ნაწილის მნიშვნელოვანი შემცირება, საშუალებას მოგვცემს გარკვეულწილად შევამციროთ ისეთი გადასახადები, როგორიც არის დღგ და აქციზი. საჭიროდ მიგვაჩნია ხელოვნური მონოპოლიების აღკვეთის მიზნით მოიხსნას ხელისუფლების მხრიდან საბაჟოზე არსებული არაოფიციალური შეზღუდვები სურსათის და ფართო მოხმარების პროდუქტების იმპორტზე."- განაცხადა გამყრელიძემ.
დავით გამყრელიძის განცხადებით, დაშინებული ბიზნესის გამოსაცოცხლებლად საქართველოს პარლამენტმა, უმოკლეს ვადაში, უნდა შეიტანოს ცვლილებები შესაბამის კანონმდებლობაში ეკონომიკური დანაშაულისთვის გამო აღმკვეთი ღონისძიების სახით წინასწარი პატიმრობის გამოყენების აკრძალვის შესახებ. მისივე განცხადებით, საქართველოში სასოფლო-სამეურნეო პროდუქციის წარმოების სტიმულირების მიზნით ამ დარგში განხორციელებული ინვესტიციები, წარმოება და გადამუშავება უახლოესი 5 წლის განმავლობაში უნდა გათავისუფლდეს ყოველგვარი გადასახადებისაგან.
შეგახსენებთ, რომ სასტუმრო "ჰოლიდეი ინის" საკონფერენციო დარბაზში ამჟამადაც მიმდინარეობს მრგვალი მაგიდა თემაზე: "ინფლაცია საქართველოში - პრობლემის მასშტაბები, მოვლენათა შესაძლო განვითარების პერსპექტივა და რეკომენდაციები ხელისუფლებისთვის.
