"თავისუფალი დემოკრატების" ლიდერი, ირაკლი ალასანია ვეტერანებისა და მათი ოჯახის წევრების სოციალურად დაცვისთვის ახალი ინიციატივით გამოდის.
ალასანიას თქმით, ტერიტორიული მთლიანობისათვის საბრძოლო მოქმედებებში დაინვალიდებული I და II ჯგუფის ვეტერანების სახელმწიფო პენსია უნდა გაუტოლდეს საარსებო მინიმუმს - 150 ლარს. ( სახელმწიფო ბიუჯეტის ხარჯი დაახლოებით 2 მილიონი ლარი.); მარჩენალდაკარგული ოჯახებისთვის თითოეულ დაკარგულ შვილზე დახმარება უნდა გაუტოლდეს საარსებო მინიმუმს - 150 ლარს. ბიუჯეტის ხარჯი დაახლოებით 2 მილიონი ლარი.) ამავე დროს ინფლაციის გათვალისწინებით უნდა მოხდეს ყოველკვარტალურად დახმარების ოდენობის გადაანგარიშება; თითოეული ვეტერანის კომპენსაცია უნდა გაიზარდოს თვეში 22 ლარიდან 35 ლარამდე. ( ბიუჯეტის სავარაუდო ხარჯი 2,5 მილიონი ლარი.)
"ამ ეტაპზე სამედიცინო დაზღვევის პოლისებით უზრუნველყოფის უპერსპექტივობის გათვალისწინებით ვეტერანების ჰოსპიტალის დაფინასება უნდა გაიზარდოს 1,5 მილიონ ლარამდე, რაც საშუალებას მისცემს წელიწადში 5-7 ათასს ვეტერანს მიიღოს რეალური სამედიცინო მომსახურეობა. სახელმწიფო ბიუჯეტიდან უნდა მოხდეს ომის I და II ჯგუფის ინვალიდებისა და მარჩენალდაკარგული ოჯახის წევრთა შვილების სახელმწიფო უმაღლეს სასწავლებელში სწავლის საფასურის თანადაფინასება. 50%-ით ბაკალავრიატის, 30% -ით მაგისტრატურის. სახელმწიფომ სრულად უნდა დაფაროს ომის I და II ჯგუფის ინვალიდებისა და მარჩენალდაკარგული ოჯახის წევრთა შვილების ბაგა-ბაღების საფასური. სახელმწიფომ ბიუჯეტიდან უნდა გამოიყოს ვეტერანთა და მარჩენალდაკარგული ოჯახის წევრთა დაკრძალვის სარიტუალო ხარჯებისთვის ერთჯერადი ფულადი დახმარება 1000 ლარის ოდენობით. (ბიუჯეტის ყოველწლიური ხარჯი 1 მილიონი ლარი)", - განაცხადა ალასანიამ პარტიის ოფისში გამართულ ბრიფინგზე.
ალასანიამ დასძინა, რომ მიზანშეწონილი იქნება, თუკი ვეტერანები და მარჩენალდაკარგული ოჯახის წევრები პენსიას მიიღებენ საბიუჯეტო სფეროში დასაქმების შემთხვევაშიც.