„კოალიცია ცვლილებების“ ერთ-ერთი ლიდერი ნიკა მელია დიღმის წინასწარი დაკავების იზოლატორში ადვოკატებმა გვიან ღამით მოინახულეს.
როგორც ადვოკატმა, გიორგი კონდახიშვილმა განაცხადა, ნიკა მელიას მოექცნენ, როგორც უკანასკნელ კრიმინალს. ადვოკატის თქმით, მელიას დაზიანება აქვს ორივე მაჯის არეში.
„ეს იყო კრიმინალური გატაცება. საპატრულო პოლიციამ გააჩერა, მათ გადასცეს, რომ ობიექტი მანქანაშიაო და ამის მერე ათეულობით პოლიციელი დაესხა თავს. დააგდეს ძირს, ჩასვეს ფარდებიან სამარშრუტო მანქანაში, სადაც ძალადობით, შეურაცხყოფით წაართვეს ტელეფონი. ვინაიდან „ფეისიაიდი“ უყენია, ცდილობდნენ გახსნას, მაგრამ ვერ გახსნეს. ხვალ დიდი იმედი მაქვს, რომ სასამართლო უზრუნველყოფს მის გამოცხადებას პროცესზე, ადმინისტრაციულ საქმეზე, რომ განმარტება გააკეთოს.
მას მოექცნენ, როგორც უკანასკნელ კრიმინალს – არავითარი ზარის უფლება, მიაყენეს ფაქტობრივად შეურაცხყოფა, დააგდეს სამარშრუტო ტაქსის იატაკზე, მას აქვს დაზიანება ორივე მაჯის არეში. იქცეოდნენ როგორც ველურებიო, – ნიკა ასე გადმოსცემს. ყოველ ხუთ წუთში უღებდნენ ვიდეოს და უგზავნიდნენ ხელმძღვანელს. ლისის მიმდებარე ტერიტორიაზე მოხდა ეს ამბავი, სადაც არ არის კამერები. ეს ადგილი განგებ იყო შერჩეული.
ცალსახად, სახეზეა პირის განზრახ უკანონო დაკავება, სახეზეა სამსახურებრივი უფლებამოსილების ბოროტად გამოყენება და ეს არის სამოხელეო დანაშაული, რომელიც არის ძალიან დიდი ხანდაზმულობის მქონე.
გზავნილია ნიკასი – ბრძოლა ბოლომდე. ღიმილის მომგვრელია მისთვისაც ამგვარი გავეშებული ქმედება შინაგან საქმეთა სამინისტროსი, აუხსნელია ეს“, – განაცხადა ნიკა მელიას ადვოკატმა.
ნიკა მელია ლისის ტბის მიმდებარე ტერიტორიაზე ადმინისტრაციული წესით დააკავეს.
