პოლონეთის პრეზიდენტი და პირველი ლედი შესაძლოა, საქართველოს ეწვიონ. ისინი სანდრა ელისაბედ რულოვსმა პოლონეთში ვიზიტის დროს დაპატიჟა. საქართველოს პირველი ლედი პოლონეთს სამუშაო ვიზიტით სტუმრობს. ანა კომაროვსკასთან შეხვედრის გარდა პირველი ლედი პრეზიდენტის რეზიდენციაში კონცერტს დაესწრო და მუსიკალურ აკადემიას ესტუმრა.
გარდა ამისა, სანდრა რულოვსი შეხვდა ექიმებს და სამედიცინო კლინიკები დაათვალიერა. პოლონეთშივე გაიმართა მისი განახლებული წიგნის "იდეალისტის ნაამბობის" პრეზენტაციაც. წიგნის გაყიდვიდან შემოსული თანხა ჰუმანიტარული პროექტებისთვის ერთ-ერთ პოლონურ საქველმოქმედო ფონდს გადაეცემა.
"წიგნი განვაახლე, რადგან ხუთი წლის წინ დავწერე. ბევრი რა მოხდა. ომის შესახებ არის დამატებითი თავი, ასევე, კაჩინსკისთან ურთიერთობის შესახებ, თავისი სურათებით. ასევე, ქართველ ოფიცრებზე, ვინც პოლონეთის ჯარში მსახურობდა,"_აცხადებს სანდრა რულოვსი.
ამასთან, საქართველოს პირველმა ლედიმ დადებითი შეფასება მისცა პოლონეთის პირველ ლედისთან შეხვედრას. "ანა კომაროვსკა ძალიან თბილი ადამიანია. რა თქმა უნდა, ჩემს უახლოეს მეგობარს მაია კაჩინსკის ვერ შეცვლის, მაგრამ, ძალიან კარგი შთაბეჭდილება მქონდა",_აღნიშნა სანდრა რულოვსმა.
ცნობისთვის, საქართველოს პირველმა ლედიმ დააჯილდოვა ის პოლონელები, რომლებიც 2008 წელს რუსეთის აგრესიის დროს მხარში ედგნენ საქართველოს. ამ ადამიანებმა ომის პერიოდში ქართველი დევნილი ბავშვები პოლონეთში მიიწვიეს, დაასვენეს და უმკურნალეს.
