რუსეთის პრეზიდენტი ვლადიმირ პუტინი კვლავაც უგულებელყოფს აშშ-ის პრეზიდენტ დონალდ ტრამპის სამშვიდობო მოწოდებებს. თუმცა, ტრამპს მაინც შეუძლია აიძულოს კრემლი, ომის დასრულების მიზნით რეალურ მოლაპარაკებებს დათანხმდეს. ამის შესახებ უკრაინის პრეზიდენტის ადმინისტრაციის ხელმძღვანელის მრჩეველმა, მიხაილო პოდოლიაკმა განაცხადა.
„აშკარაა, რომ პუტინმა ფსონი დადო პრეზიდენტ ტრამპის პირად რეპუტაციაზე ცინიკურ თავდასხმებზე და იმედოვნებდა მის მზადყოფნას რუსეთთან დიალოგისთვის. ბოლო დღეებში უკრაინაზე რაკეტებითა და დრონებით განხორციელებული თავხედური დარტყმები უტიფრად დემონსტრაციულია: „ნახეთ, რა შემიძლია გავაკეთო!“ - დაწერა პოდოლიაკმა.
პოდოლიაკმა დასძინა, რომ რუსეთის საგარეო საქმეთა მინისტრის, სერგეი ლავროვის, ბოლოდროინდელი განცხადებები მოსკოვის მიერ უკრაინის სუვერენიტეტის აღიარების სურვილის არარსებობის შესახებ უარყოფს ომის მოგვარების ყველა ამერიკულ ინიციატივას. მან ხაზგასმით აღნიშნა, რომ რუსეთი ომს აღვივებს და თეთრი სახლის „მის სიტყვებზე პასუხის გაცემის მზაობას“ ამოწმებს.
უკრაინის პრეზიდენტის ოფისის ხელმძღვანელის მრჩეველი მიიჩნევს, რომ ტრამპს ჯერ კიდევ აქვს არჩევანი.
„პირველი ვარიანტია, პუტინის „სიგიჟის“ შესახებ თქვენი სიტყვები ქმედებებით დაასაბუთოთ. შემოიღოთ ახალი სანქციები, მოითხოვოთ რუსეთის ფედერაციასთან ვაჭრობაზე სრული ემბარგო, დაამტკიცოთ ახალი იარაღის მიწოდება და გააძლიეროთ უკრაინის საჰაერო თავდაცვა.
მეორე არის მხრების აჩეჩვა, პრობლემის გადაჭარბებული სირთულის აღიარება და ომის დასრულების შესახებ მოლაპარაკებების პროცესიდან გასვლა. კრემლი დარწმუნებულია, რომ სწორედ ეს მოხდება“, - აღნიშნა პოდოლიაკმა.
