ეკონომიკის სტიმულირების, მოსახლეობის საცხოვრებელი პირობების გაუმჯობესების, ძველი თბილისის რეაბილიტაციისა და დამატებით ახალი სამუშაო ადგილების შექმნის მიზნით დაწყებული, თბილისის მერიის პროექტი "ძველი თბილისის ახალი სიცოცხლე" ქალაქში წარმატებით ხორციელდება.
თბილისის მერი გიგი უგულავა პროექტ „ძველი თბილისის ახალი სიცოცხლის" მეორე ეტაპის ფარგლებში, სამშენებლო კომპანია „კერა +" მიერ, კრწანისში დასრულებულ მშენებლობას დაათვალიერებს და იმ ოჯახების წარმომადგენლებს შეხვდება, რომლებიც აღნიშნულ საცხოვრებელ სახლში ახალი, კომფორტული ბინებით დაკმაყოფილდნენ.
სამშენებლო კომპანია „კერა+"-მა "ძველი თბილისის ახალი სიცოცხლის" მეორე ეტაპში მიიღო მონაწილეობა და პროექტის ფარგლებში, კრწანისში 3 255 კვ.მეტრ ტერიტორიაზე, ექვს სართულიანი სახლის მშენებლობა დაასრულა.
კომპანიამ ნადიკვარისა და ნიორაძის ქუჩებზე ავარიულ და გაუსაძლის პირობებში მცხოვრები ოთხი ოჯახი ახალი, კომფორტული ბინებით დააკმაყოფილა. მათ გარდა ახალი ბინებით დაკმაყოფილდა ასევე ის 52 ოჯახი, რომლებმაც სამშენებლო კომპანიისგან სახლები რამოდენიმე წლის წინ შეიძინეს და მშენებლობის დასრულებას ელოდნენ. თანამედროვე დიზაინის კორპუსებში დამონტაჟდა პანორამული ლიფტები, სადარბაზოები მოპირკეთდა კერამო-გრანიტის ფილებით და ეზო კეთილმოეწყო.
აღნიშნული მშენებლობის დასასრულებლად „კერა +"-ს "საქართველოს ბანკმა" „ძველი თბილისის ახალი სიცოცხლის" ფარგლებში 586 000 დოლარის ოდენობით სესხი გამოუყო.Gმშენებლობაზე 100 ადამიანი დასაქმდა.
პროექტი, რომლის მიზანი სამუშაო ადგილების შექმნა, ავარიული საბინაო ფონდის გაუმჯობესება, ძველი თბილისის რეაბილიტაცია და ეკონომიკის სტიმულირებაა გრძელდება. თბილისის მერიამ პროექტის მეორე ეტაპში გამარჯვებული ცხრა სამშენებლო კომპანია ივლისში გამოავლინა. ისინი ორი წლის განმავლობაში 223 ოჯახს ახალი ბინებით დააკმაყოფილებენ.
"ძველი თბილისის ახალი სიცოცხლის" მესამე ეტაპს თბილისის მერია უახლოეს მომავალში გამოაცხადებს.
