საკრებულოს რესპუბლიკელი წევრი თინათინ ხიდაშელი აცხადებს, რომ მიწისძვრით დაზარალებული 50 ოჯახის პრობლემის მოსაგვარებლად გასულ კვირას მის მიერ საკრებულოში შეტანილი ინიციატივა დაკმაყოფილდა. კერძოდ, 17 დეკემბერს თბილისის მთავრობამ საკუთარ გადაწყვეტილებაში ცვლილება შეიტანა, რომლის თანახმადაც, მიწისძვრით დაზარალებულ 50 ოჯახს ფართის დაკანონების საშუალება მიეცათ.
"ამ ადამიანებს მოსპობილი ჰქონდათ საკუთარ საცხოვრებელ ადგილთა დაკანონების საშუალება. აქამდე მათ უკანონოდ სთხოვდნენ ფართების დათმობას იმის სანაცვლოდ, სადაც ისინი შეასახლეს. მაშინ, როცა არცერთ სხვა ადამიანს, რომლებსაც წლების მანძილზე ბინები გადასცეს, საკუთარი ფართის გადაცემის პირობა არ წაუყენეს,"_აღნიშნა ხიდაშელმა.
მისი თქმით, რვაწლიანი ბრძოლის შემდეგ ამ ხალხს, ბოლოსდაბოლოს, შეეძლება ბინების დაკანონება სანაცვლო ფართის მიცემის გარეშე.
ხიდაშელი აცხადებს, რომ მათ კონკრეტული პირობა მიიღეს, რომ თუ მიწისძვრით დაზარალებული ადამიანები მიმართავდნენ საკრებულოს, მათ საკითხს ინდივიდუალურად შეისწავლიდნენ. ქალაქის მთავრობის მხრიდან დაპირების მიუხედავად, თინა ხიდაშელის ინიციატივა საკრებულოს დღის წესრიგში მაინც დარჩება.
როგორც "ჯი-ეიჩ-ენთან" კომენტირებისას მიწისძვრით დაზარალებულმა მარინა ნადირაშვილმა განაცხადა, ბინების გადაცემის პრობლემა მხოლოდ 50 ოჯახს შეექმნა, რადგან 2004 წელს მიწისძვრით დაზარალებულთა ფონდის თავმჯდომარემ მათი საქმეები სასამართლოს გამოსახლების მიზნით გადასცა. მოტივი ის იყო, თითქოს ამ ოჯახებს საკუთარი ფართები არ ეკუთვნოდათ. ნადირაშვილის თქმით, ამის მიზეზი მათ უბედურებაზე ფულის შოვნის სურვილი იყო. ამდენად, როცა 300 ოჯახი ბინებით დააკმაყოფილეს, 50 ოჯახს პრობლემა შეექმნა და ბინების დაკანონების პირობა მხოლოდ საკუთარი ფართის დათმობის ხარჯზე შეეძლოთ.
