„დემოკრატიული მოძრაობა": - ხელისუფლება, რომელიც აღიარებს, რომ დაუშვა შეცდომები, ქვეყანაში არის უმძიმესი სოციალური ფონი და ღიად აცხადებს, რომ მას არ შესწევს უნარი ქვეყანა ამ მდგომარეობიდან გამოყვანოს, უნდა გადადგეს!
დღეს, 27 იანვარს, „დემოკრატიული მოძრაობის" მთავარი საბჭოს წევრმა თამარ ცინცაბაძემ, პარტიის მთავარ ოფისში ქვეყანაში შექმნილ სოციალურ ვითარებასა და ინფლაციის კატასროფულად მზარდ ტენდენციასთან დაკავშირებით ბრიფინგი გამართა. გარდა აღნიშნული საკითხებისა, თამარ ცინცაბაძე მიხეილ სააკაშვილის გამოსვლასაც გამოეხმაურა.
"ის, რომ ქვეყანამ 2010 წელი ორნიშნა ინფლაციით დაამთავრა ყველამ ვიცით 11.2%. სურსათზე ფასის მატების მაჩვენებელი 23,1%. პურზე ფასმა მოიმატა 19,8%-ით, ზეთზე და ცხიმზე - 34,7%-ით, ბოსტნეულსა და კარტოფილზე _ 44,3%-ით, ხილზე 32,6%--ით. აღარაფერს ვამბობთ საწვავის, მედიკამენტებისა და სამედიცინო მომსახურების კატასტროფულად გაზრდილ ფასებზე. პრეზიდენტმა კი გვამცნო, რომ ხელისუფლება ინფლაციის წინაშე უძლურია და იცით თურმე რატომ? იმიტომ, რომ როგორც პრეზიდენტმა აღნიშნა საქართველოში ინფლაციის გამომწვევი ძირითადი მიზეზი არის ის, რომ "ჩინელებმა ჭამა დაიწყეს და ველოსიპედებიდან მანქანებში გადასხდნენ". დარჩენილმა ცივილურმა მსოფლიომ მოახერხა საკუთარი მოსახლეობის დაცვა კატასტროფული ინფლაციისაგან. ჩვენს მეზობელ სომხეთში ინფლაციის მაჩვენებელი 7,5%, აზერბაიჯანში - 5,7%; რომ არაფერი ვთქვათ ამერიკასა და ევროპაზე, სადაც სურსათის ინფლაცია 1,8%-ია. საქართველოში კი ინფლაციის დონეს მსოფლიოში ანალოგი არა აქვს. ხელისუფლება კი ამაყად აცხადებს, რომ ეს მისი ბრალია არ არის და აღნიშნული მდგომარეობიდან გამოსავალიც არ იცის. ასე რომ, უახლოეს მომავალში ამ მხრივ მდგომარეობის გაუმჯობესებას არ უნდა ველოდოთ. 2008 წელს, როდესაც მსოფლიო მართლაც კრიზისმა მოიცვა, სააკაშვილი და მისი ხელისუფლება ამაყად აცხადებდა, რომ საქართველოს მათი "ბრძნული" პოლიტიკის გამო კრიზისი არ შეხებია. როცა მთელმა მსოფლიომ კრიზისი პრაქტიკულად დაძლია, ჩვენთან თურმე იგი ახლა იწყება და თავის დაღწევის მექანიზმებიც ხელისუფლებისთვის უცნობია. აი ახლა კი, გვინდა შეკითხვა დაგისვათ: - როდის იტყუებოდით, ბატონო პრეზიდენტო, 2008 წელს, ახლა, თუ ყოველთვის?!", - განაცხადა ცინცაბაძემ.
მისი თქმით, პრეზიდენტმა აღიარა რომ ქვეყანაში მედიკამენტებზე ფასი მაღალია, თუმცა ხელისუფლებას არ შესწევს უნარი, იმისა რომ ღირებულებამ დაიწიოს.
"სააკაშვილი გვარწმუნებს, რომ 100 ახალი საავადმყოფოს პროექტი არ ჩაშლილა. 100 ახალი საავადმყოფოს ნაცვლად, რამდენიმე წლის დაგვიანებით თურმე 146 ახალი საავადმყოფო გვექნება, რომლებიც, როგორც პრეზიდენტმა ბრძანა, "ავადმყოფებით უნდა გადაივსოს". გადაივსება თუ ხალხი იშიმშილებს, მძიმე სოციალურ გარემოში იცხოვრებს, არ იქნება ხელმისაწვდომი პირველადი ჯანდაცვა, გამოკვლევები, მედიკამენტები, სათანადო ყურადღება არ დაეთმობა პრევენციულ ღონისძიებებს. პრეზიდენტი ალბათ გულისხმობდა, რომ ჯანმრთელობის უკიდურესად გაუარესების გამო ჩვენი ქვეყნის მოქალაქეებით გადაივსება საავადმყოფოები, თუმცა პრეზიდენტს ისიც კი დაავიწყდა, რომ უსახსრო ადამიანებს საავადმყოფოში მოხვედრის უფლებაც წართმეული აქვთ. ჯანდაცვის სფეროსთან დაკავშირებით ერთ საკითხსაც მინდა შევეხო. როგორც პრეზიდენტმა ბრძანა სადაზღვევო მოგება არის დაუშვებლად მაღალი. ეს "დაუშვებლობა", მიუხედავად ჩვენი არაერთგზის მოთხოვნისა, წლების განმავლობაში გრძელდება და ჯანდაცვის სფეროზე დეფიციტურ ბიუჯეტში გამოყოფილი სახსრების უდიდესი ნაწილი კერძო სექტორის მოგებას ხმარდება", - აღნიშნავს ცინცაბაძე.
"დემოკრატიული მოძრაობა" აღნიშნავს რომ, ხელისუფლების ფისკალურ-ეკონომიკური პოლიტიკა ქვეყნისთვის, თითოეული მოქალაქისთვის დამღუპველია.
" ჩვენ ასევე, გავახმოვანეთ პარტიის ეკონომიკური სტრატეგიაც, სადაც დეტალურადაა განხილული ყველა ის ქმედითი ღონისძიება, რამაც ქვეყანა კრიზისიდან უნდა გამოიყვანოს. საქართველოს მოსახლეობა ნამდვილად არის მიმტევებელი და მომთმენი, მაგრამ არა უსაზღვროდ. ხელისუფლება, რომელიც აღიარებს, რომ დაუშვა შეცდომები, ქვეყანაში არის უმძიმესი სოციალური ფონი და ღიად აცხადებს, რომ მას არ შესწევს უნარი ქვეყნა ამ მდგომარეობიდან გამოყვანოს, უნდა გადადგეს!", - განმარტავს ცინცაბაძე.