"თავისუფალი საქართველო"-ს ლიდერი კახა კუკავა და "ხალხის პარტიის" თავმჯდომარე კობა დავითაშვილი ევროსაბჭოს საპარლამენტო ასამბლეის პრეზიდენტს მევლუდ ჩაუშოღლუს შეხვდნენ.
როგორც "ჯი-ეიჩ-ენს" "თავისუფლაი საქართველოს" პრეს სამსახურიდან აცნობეს, შეხვედრაზე განხილულ იქნა საქართველოში არსებული საშინაო პოლიტიკის რამდენიმე ძირითადი საკითხი: კერძოდ კი, წინა წლებში გაყალბებული არჩევნები და ამჟამად მიმდინარე მოლაპარაკებები ხელისუფლებასა და ოპოზიციას შორის საარჩევნო კოდექსის შესახებ; ახალი კონსტიტუცია, რომელიც შესაძლებლობას აძლევს მიხეილ სააკაშვილს, დარჩეს ხელისუფლებაში მეორე ვადის ამოწურვის შემდგომ;თავდასხმები პოლიტიკურ ოპონენტებზე, მათი გატაცებისა და ცემის შესახებ; პოლიტიკური პატიმრები; დევნილების გამოსახლება საქართველოს დედაქალაქიდან და ძალადობა მათ წინააღმდეგ; სიტყვის თავისუფლება და ხელისუფლების მიერ წარმოებული პროპაგანდისტული კამპანია - ამ კონტექსტში განხილული იქნა, აგრეთვე, ტელეკომპანიების „იმედი" და „რუსთავი-2"-ის მიერ გავრცელებული დეზინფორმაცია ევროსაბჭოს საქმიანობასთან დაკავშირებით; კონფლიქტები, რუსეთ-საქართველოს ურთიერთობები და ამ კონფლიქტების გადაწყვეტის გზები.
შეხვედრაზე დელეგაციის წევრებმა ასევე წამოჭრეს საკითხი რამდენად შესაძლებელი იქნება ევროსაბჭომ განახორციელოს უშუალო მონიტორინგი, როგორც პოლიტიკური პატიმრების უფლებებთან დაკავშირებით, აგრეთვე ახალი საარჩევნო კოდექსის იმპლემენტაციასთან დაკავშირებით.
ვიზიტის ფარგლებში მიღწეულ იქნა შეთანხმება შემდგომი თანამშრომლობის შესახებ ევროპის საბჭოს სხვადასხვა ინსტიტუციების ფარგლებში.
ევროპის საბჭოს საპარლამენტო ასამბლეის პრეზიდენტთან შეხვედრამდე "ეროვნული საბჭოს" ლიდერებმა გამართეს შეხვედრა საპარლამენტო ასამბლეის გენერალურ მდივანთან, რომელთანაც განხილული იქნა იგივე თემატიკა.