დღეს, "თავისუფალი დემოკრატების" ინიციატივით, "ქორთიარდ მერიოტში" ახალი კანონპროექტის _ "დაცული მოქალაქე_დაცული პოლიციელი" პრეზენტაცია შედგა. განხილვას ექსპერტებიც ესწრებოდნენ.
როგორც "თავისუფალი დემოკრატების" ლიდერმა ირაკლი ალასანიამ განაცხადა, პოლიციისა და უშიშროების სამსახურები მმართველი გუნდის მხრიდან სათანადოდ დამოუკიდებელნი არ არიან და ხელისუფლება მათზე ზეწოლას ახორციელებს.
"საზოგადოებას კონკრეტულ წინადადებას წარვუდგენთ_"დაცული მოქალაქე_დაცული პოლიციელი". ჩვენი ამოცანაა, პოლიტიკური დიქტატურისაგან დავიცვათ პოლიცია. ეს ცვლილებები აუცილებელია, რათა შემდეგ დემოკრატიული არჩევნების ჩატარება გახდეს შესაძლებელი,"_ აღნიშნა ალასანიამ.
მისი თქმით, მომავალში პოლიციის დეპარტამენტი უნდა ჩამოყალიბდეს, რომელიც შსს-ს გაემიჯნება, "ეს დეპარტამენტი დამოუკიდებელი უნდა იყოს. მაშინ შსს-ს არ ექნება ბერკეტი მის საქმეში ვინმე ჩაერიოს",_აღნიშნა ირაკლი ალასანიამ.
მისი აზრით, ამ პროექტით პოლიციის პროფესიონალი დამოუკიდებლობის გარანტია განისაზღვრება.
როგორც პროექტის ავტორმა, პარტიის ერთ-ერთმა ლიდერმა ლევან იზორიამ განაცხადა, მათი პროექტრის მთავარი არსი პოლიციის დეპოლიტიზაციაა.
"თავისუფალი დემოკრატების" აზრით, პოლიციის დეპოლიტიზაციის მიზნით, შსს-ს რეორგანიზაცია უნდა მოხდეს და ჩამოყალიბდეს სამი დეპარტამენტი: პოლიციის დეპარტამენტი, რომელიც ორ მნიშვნელოვან ქვესტრუქტურას - საპატრულო და კრიმინალურ პოლიციას მოიცავს, სასაზღვრო პოლიციის დეპარტამენტი და სამაშველო დეპარტამენტი. შსს-ს უნდა აეკრძალოს ოპერატიულ დონეზე პოლიციის საქმიანობაში უშუალო ჩარევა. შსს-ს სისტემას უნდა გამოეყოს უშიშროების სამსახურები და ისინი დამოუკიდებელი დეპარტამენტის სახით ჩამოყალიბდეს.
ირაკლი ალასანიას გუნდი მიიჩნევს, რომ პოლიცია უნდა იყოს შსს-ს სისტემაში დეპარტამენტის სახით არსებული სამართალდამცავი ორგანო, რომელიც საზოგადოებრივ წესრიგსა და უსაფრთხოებას უზრუნველყოფს. პოლიციის დეპარტამენტის უფროსს მინისტრის წარდგინებით ამტკიცებს საქართველოს პარლამენტი. იგი უნდა იყოს პროფესიონალი პოლიციელი, რომელსაც დანიშვნიდან ბოლო ორი წლის განმავლობაში უმაღლესი რანგის პოლიციის თანამდებობაზე მუშაობის გამოცდილება ექნება. ამასთან, პოლიციის დეპარტამენტის უფროსი ანგარიშვალდებული იქნება შს მინისტრისა და პარლამენტის წინაშე.
შეგახსენებთ, პოლიციის შესახებ ამჟამად მოქმედი კანონი 1993 წელს არის მიღებული. პარტიაში მიიჩნევენ, რომ იგი საბჭოთა მილიციის კანონის გადმონაშთია.