საქართველოს საგარეო საქმეთა სამინისტრო ცხინვალის სეპარატისტული რეჟიმის ოკუპირებულ ტერიტორიაზე ისტორიული გეოგრაფიული დასახელებების გადარქმევის მიზნით მიღებულ კანონს აპროტესტებს.
ამის შესახებ განცხადებას საგარეო საქმეთა სამინისტრო ავრცელებს.
"აღნიშნული ფაქტი წარმოადგენს რუსეთის ფედერაციის მიერ წარმოებული ეთნიკური წმენდის პოლიტიკის ლოგიკურ გაგრძელებას, რაც მიზნად ისახავს ოკუპირებულ ტერიტორიებზე ქართული მოსახლეობისა და მისი არსებობის კვალის სრულ განადგურებას, ამჯერად რუსეთი მოქმედებს არა თვითონ, არამედ მის მიერ შექმნილი მარიონეტული რეჟიმების მეშვეობით, რომლებიც იმყოფებიან მის სრულ კონტროლის ქვეშ", - ნათქვამია განცხადებაში.
ამასთან, საგარეო საქმეთა სამინისტრო გამოხატავს მკაცრ პროტესტს რუსეთის ფედერაციის საოკუპაციო რეჟიმების ქმედების გამო და მოუწოდებს საერთაშორისო საზოგადოებას გამოიყენონ ყველა საშუალებები, რათა შეაჩერონ რუსეთის მიერ საქართველოს ოკუპირებულ ტერიტორიებზე ეთნიკური წმენდის ამგვარი გამოვლინებები.
შეგახსენებთ, რომ მასმედიის ელექტრონულ საშუალებებში გავრცელდა ინფორმაცია, რომლის თანახმად ცხინვალის მარიონეტულმა რეჟიმმა მიიღო ე.წ. კანონი ოკუპირებულ ტერიტორიაზე არსებული ისტორიული გეოგრაფიული დასახელებების გადარქმევის მიზნით.