საქართველოს დელეგაცია ნატოს წევრი ქვეყნების წარმომადგენლებს ნატოს წლიური ეროვნული პროგრამის პროექტს გააცნობს.
როგორც ბელგიაში გამგზავრების წინ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის მოადგილემ ელენე ხოშტარიამ განაცხადა, ნატოს შტაბ-ბინაში ორგანიზაციის 28 წევრი ქვეყნის წარმომადგენელს საქართველოს წლიურ, ეროვნული პროგრამას გააცნობენ. პროგრამაში საუბარია იმ რეფორმებზე, რომლის განხორციელებასაც საქართველო 2011 წელს გეგმავს.
"სანამ ამ დოკუმენტს საბოლოოდ დავამტკიცებთ, ჩვენთვის მნიშვნელოვანია, ერთი, მათ გავაცნოთ რეფორმების გეგმა და, მეორე, მოვისმინოთ მათი შეფასებები და გავითვალისწინოთ გამოთქმული მოსაზრებები", - აღნიშნა ელენე ხოშტარიამ.
მისივე თქმით, ეროვნული გეგმა წარმოადგენს საქართველოს ინსტრუმენტს, რომელიც ხელს უწყობს ქვეყნის ჩრდილოატლანტიკურ ალიანსში გაწევრიანებას.