უკრაინის ფინანსთა მინისტრმა სერგიი მარჩენკომ და იაპონიის საგანგებო და სრულუფლებიანმა ელჩმა უკრაინაში მასაში ნაკაგომემ ხელი მოაწერეს შეთანხმებას უკრაინისთვის 471,9 მილიარდი იაპონური იენის [3 მილიარდი დოლარი] ოდენობის სესხის გადაცემის შესახებ.
სესხი G7-ის Extraordinary Revenue Acceleration for Ukraine პროგრამის ნაწილია, რომელიც კიევისთვის 50-მილიარდი დოლარის მოცულობის სესხის გაცემას ითვალისწინებს რეკონსტრუქციისა და თავდაცვის მიზნებისთვის.
გამოყოფილი თანხა G7-ის წევრი სახელმწიფოების კონტროლქვეშ არსებული 300 მილიარდი დოლარის ღირებულების გაყინულ რუსულ აქტივებზე დარიცხული პროცენტით დაიფარება.
დაფინანსება გათვალისწინებულია 30 წლით. შემოსული თანხები მოხმარდება პრიორიტეტული საბიუჯეტო საჭიროებების მხარდაჭერას და უკრაინის რეკონსტრუქციისა და განვითარების ხელშეწყობას.
ფინანსთა მინისტრის სერგიი მარჩენკოს თქმით, ბოლო სამი წლის განმავლობაში იაპონიამ უკრაინისთვის უკვე უზრუნველყო საბიუჯეტო დახმარება 8,5 მილიარდ დოლარზე მეტის ოდენობით.
