უკრაინის თავდაცვის ძალებმა კურსკის ოლქში რუსეთის არმიის 448-ე სარაკეტო ბრიგადის მუდმივი დისლოკაციის პუნქტს დაარტყეს, რომელიც ბზობის დღესასწაულზე ქალაქ სუმს თავს დაესხა. ამის შესახებ ინფორმაციას უკრაინის შეიარაღებული ძალების გენშტაბი ავრცელებს.
გენერალური შტაბის განცხადებით, უპილოტო სისტემების ძალების ქვედანაყოფებმა, სპეციალური ოპერაციის ძალებმა და უსაფრთხოების სამსახურმა იერიში მიიტანეს ზოგიერთ ობიექტზე, რომელსაც კავშირი აქვს ომის დამნაშავეებთან - მათთან, ვინც მონაწილეობდა ქალაქ სუმიზე 13 აპრილს განხორციელებულ სარაკეტო დარტყმაში და უკრაინელი ხალხის წინააღმდეგ ჩადენილ სხვა სამხედრო დანაშაულში.
კერძოდ, იერიში განხორციელდა რუსი ოკუპანტების 448-ე სარაკეტო ბრიგადის მუდმივი დისლოკაციის პუნქტზე და დაფიქსირდა საბრძოლო მასალის ორმაგი აფეთქება. დარტყმის შედეგები ზუსტდება.
გენშტაბი ხაზს უსვამს: ყველა რუსული სამხედრო ნაწილი, დივიზია და მათი სამხედრო მოსამსახურეები, რომლებიც ახორციელებენ უკრაინის მშვიდობიანი ქალაქების და მშვიდობიანი მოსახლეობის დაბომბვას, გამოვლენილი იქნება და მათ გარდაუვალი ანგარიშსწორება ემუქრებათ.
ასევე გენშტაბის განცხადებით, რუსი ოკუპანტების მნიშვნელოვანი სამხედრო ობიექტების წინააღმდეგ მიზანმიმართული და სისტემატური საბრძოლო ოპერაციები გაგრძელდება უკრაინის წინააღმდეგ რუსეთის ფედერაციის შეიარაღებული აგრესიის დასრულებამდე.
13 აპრილს სუმის ოლქის ადმინისტრაციულ ცენტრზე, ქალაქ სუმიზე რუსეთის სარაკეტო დარტყმის შედეგად დაიღუპა 35 და დაიჭრა 120-ზე მეტი ადამიანი, მათ შორის ბავშვები.
